İtaliya nüvə sintezində aparıcı mövqedəri.
Milli.Az xəbər verir ki, bunu İtaliyanın baş naziri Ciorcia Meloni Bakıda keçirilən COP29 sammitində çıxışı zamanı deyib.
Meloni qlobal istiləşməni 1,5 dərəcə ilə məhdudlaşdırmaq üçün birgə fəaliyyətə çağırıb və sammitə ev sahibliyi etdiyi üçün Azərbaycana təşəkkür edib.
O, Dubay sammitində qarşıya qoyulan məqsədlərdən danışaraq, 2030-cu ilə qədər bərpa olunan enerji potensialının üç dəfə və enerji səmərəliliyinin iki dəfə artırılmasının vacibliyini vurğulayaraq, ən böyük istixana qazı emissiyaları mənbələri arasında əməkdaşlığın vacibliyini qeyd edib.
Onun sözlərinə görə, İtaliya iqlim fondundan Afrika təşəbbüslərinə 4 milyard avrodan çox vəsait ayırmaqla və həm Yaşıl İqlim Fondunu, həm də Təzminat Fondunu dəstəkləməklə üzərinə düşəni etməyə hazırdır.
Meloni həmçinin balanslaşdırılmış enerji keçidinin və dəstəklənən texnologiya neytrallığının vacibliyini vurğulayıb. O, bərpa olunan mənbələr, bioyanacaq, hidrogen və nüvə sintezini əhatə edən şaxələndirilmiş bir yanaşma təklif edərək, qalıcı yanacaqlara vahid alternativin olmadığını qeyd edib.
"İtaliya nüvə sintezi sahəsində aparıcı mövqedədir. G7-yə sədrliyimiz çərçivəsində biz Atom Enerjisi üzrə Beynəlxalq Agentliyin sponsorluğu ilə World Fusion Energy Group-un ilk iclasını təşkil etdik. Oyunun qaydalarını dəyişdirmək, enerjini geosiyasi silahdan ortaq resursa çevirmək potensialına malik olan bu texnologiyanı yenidən işə salmağa qərarlıyıq", - o bildirib.
Qeyd edək ki, noyabrın 11-də BMT-nin İqlim Dəyişikliyi üzrə Çərçivə Konvensiyasının (COP29) Tərəflər Konfransının 29-cu sessiyasının açılışı olub. Dünən isə Bakıda BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29) Liderlər Sammitinin açılış mərasimi keçirilib.
Noyabrın 22-dək Bakı Stadionunda keçiriləcək COP29 Azərbaycanın bu günədək təşkil etdiyi ən nəhəng tədbirdir və regionda ilk dəfə Azərbaycanda baş tutur.
COP29 çərçivəsində ən yüksək səviyyəli tədbir - Dünya Liderlərinin İqlim Fəaliyyəti Sammiti noyabrın 12-13-də təşkil olunacaq.
COP29-dan əsas gözlənti iqlim maliyyəsi ilə bağlı ədalətli və ambisiyalı Yeni Kollektiv Kəmiyyət Hədəfinin (NCQG) razılaşdırılmasından ibarətdir.
COP29 Sədrliyi tərəfindən iqlim fəaliyyəti ilə dayanıqlı inkişaf məqsədləri arasında əlaqəni ehtiva edən, yaşıl enerji dəhlizləri, yaşıl enerji saxlancları, iqlim dayanıqlılığı üçün harmoniya, təmiz hidrogen, orqanik tullantılarda metanın azaldılması, yaşıl rəqəmsal fəaliyyət və digər mövzuları əhatə edən 14 təşəbbüs irəli sürülüb.
İqlim maliyyəsinin yaradılması fəaliyyət üçün şərait yaradan əsas prioritet olmaqla yanaşı, hamını bir araya gətirməklə 1,5°C öhdəliyinin yerinə yetirilməsinə töhfə verəcək.
Milli.Az
