“Əl-Nəsr”in və Portuqaliya yığmasının ulduz hücumçusu və kapitanı Kristiano Ronaldo karyerasında 1000 qol vurmaq ehtimalından söhbət açıb.
Arena.az xatırladır ki, hazırda veteran hücumçunun hesabında 908 qol var.
“Dürüst olum – hazırda, mən cari anı yaşayıram və düşünürəm ki, bu, ən vacib xüsusdur. Mən daha, uzunmüddətli perspektivlər haqqında düşünə bilmirəm. İndi anı yaşamaq, vaxtdan həzz almaq istəyirəm.
Mən hələ də işlə məşğulam və gücüm daxilində hər şeyi edəcəyəm. Əvvəllər açıq şəkildə 1000 qola çatmaq istədiyimi bildirdim. Amma mənim prinsipim belədir: anı yaşa və gələcək illərdə ayaqlarımın nə cavab verəcəyini gör. 1000 qol vura bilsəm – yaxşıdır. Amma bu, müyəssər olmasa belə, onda, hələ heç kim məndən çox qol vurmayıb”, – “A Bola” nəşri Ronaldodan sitat gətirir.
Kristiano Ronaldo 2023-cü ilin yanvar ayından “Əl-Nəsr”də çıxış edir. Portuqal ulduz ərəb klubuna 2023-cü ilin yanvarında “Mançester Yunayted”dən azad agent qismində keçib. Ronaldonun “Əl-Nəsr”lə müqaviləsi 2025-ci ilin iyun ayının sonuna qədər qüvvədədir.
Cari mövsümdə Ronaldo “Əl-Nəsr”in heyətində 15 oyuna 10 qol və 3 məhsuldar ötürmə ilə fərqlənib. Kristianonun “Əl-Nəsr” karyerası ümumilikdə 79 oyun, 68 qol və 18 məhsuldar ötürmədən ibarətdir.
Ronaldo “Əl-Nəsr”dən öncə “Real”, “Mançester Yunayted”, “Yuventus”, “Sportinq” (Lissabon) komandalarında çıxış edib. Portuqal ulduz bu komandaların hər biri ilə çoxsaylı qənimətlər qazanıb, müxtəlif rekordlara imza atıb. Ronaldo “Əl-Nəsr”lə də Ərəb Klublarının Çempionlar Kubokunu (2023) qazanıb, həmçinin Səudiyyə Ərəbistanı Peşəkar Liqasının 2023/2024-cü illər mövsümünün ən sərrast qolçusu (35 qol) olub.
Kristiano Portuqaliya yığmasının heyətində 216 oyuna 133 qol vurub və 45 məhsuldar ötürmə verib. Ronaldonun yığma komandanın heyətindəki oyun və qol sayı mütləq dünya rekordudur.
Ulduz futbolçu Portuqaliya yığmasının heyətində Avropa çempionatının (2016), UEFA Millətlər Liqasının (2019) qalibi, həmçinin Avropa çempionatını gümüş (2004) və bürünc (2012), FIFA Konfederasiyalar Kubokunun (2017) bürünc mükafatçısı olub.
“Transfermarkt” internet-portalı 39 yaşlı veteran hücumçunun transfer dəyərini 15 milyon avro məbləğində qiymətləndirir.
