Qəribədir, Azərbaycanda dünya iqlim sammiti - BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu konfransı keçirilir, ancaq Avropada bəziləri məhz bu tədbir boyunca Bakıya qarşı “qeyri-ekoloji” – yəni ekologiyaya, ətraf mühitə heç bir aidiyyəti olmayan hücum təşkil edirlər.
İndi də estafet “məşhur isveçli ekoloji fəal” kimi təqdim edilən Qreta Tunberqə verilib: O, Tiflisdə Azərbaycana qarşı aksiya keçirdikdən sonra İrəvana gedib, ötən gün orada “Azərbaycanın təcavüzünün insan hüquqlarına və ətraf mühitin mühafizəsinə təsiri” mövzusundakı forumda iştirak edib. Bunun ardınca isə qondarma “erməni soyqırımı” memorialı önündə şəkil çəkdirib.
Bəllidir ki, bu Tunberq hansı pullarla Avropadan Tiflisə və oradan da İrəvana gedir; bəllidir ölkələri basa-basa “burnumuzun ucuna” qədər hansı maliyyə ilə gəlib; bəllidir onun arxasında duran güclər və onların pis niyyəti – ona görə Azərbaycanın 17 min kv.km ərazisi işğal olunanda, evlər, mülklər, obyektlər darmadağın edilib, viranəyə çevriləndə, min kv.km-lərlə yaşıllıq məhv ediləndə, böyük bir ərazi səhralığa çevriləndə bu ekofəalın harda olması, niyə səs çıxartmadığı haqda qətiyyən sual vermək niyyətində deyiləm.
Məni sadəcə, iki məsələ maraqlandırır. Əvvəla, motiv, aksiyanın hədəfi, məkanı, ikincisi, Tiflisdə ona “maskalanaraq” dəstək verən Vəfa Nağı...
İkincidən başlayaq: Vəfa Nağı Tiflisdə aksiyaya qoşulur - əcəb edir, hər kəs fikrini ifadə etməkdə azaddır. Yaxşı, Vəfa Nağı niyə Tiflisdə "We - azerbaijan is stand with karabakh armenia" ("Biz, azərbaycanlılar Qarabağ ermənilərinin yanındayıq") şüarını qaldırır?
Heç onu da sual etməyəcəyəm ki, “ermənilərin yanındakı” “siz azərbaycanlılar” kimlərsiniz? Əgər hansısa azərbaycanlı Xocalıda Vəfa Nağı yaşda, ancaq “o başda” və o boyda olmayan 1200 qız-gəlini əsir aparıb, səhərisi gün azərbaycanlıları “üzəçıxdıya” çağıran, körpələri qətl edən, bir milyon insanı onillərdir didərgin salan, hətta “dünən” - İkinci Qarabağ savaşında gecə ikən müharibədən 100 km kənarda olan şəhərlərimizi vurub, dinc insanları qətlə yetirən ermənilərin əməllərini “unudub”, onların yanında olmaq istəyirsə, getsin, hətta arzulayırsa, “erməni soyqırımı” abidəsi önündə dizini yerə atsın.
Ancaq anlamıram, ermənilərin yanında olmaq üçün Vəfa Nağı və Tunberq niyə COP29-u gözləyirdi ki? Niyə Bakıda keçirilən iqlim sammiti Azərbaycana qarşı “ermənilərin yanında olmaq aksiyalarına” çevrilməlidir?
Tunberqın dalında duranlar hansı məntiqlə bu zamanlamanı aparıblar?
Məkana qayıdaq: Avropada Azərbaycana qarşı aksiya keçirməklə Tiflisdə keçirməyin bir fərqi varmı? İtin karvana 3 min, yainki 1 min km-dan hürməsi nəyi dəyişir? Onsuz da o aksiyada iki cüt, bir Nağı adam var – bəlkə, Avropada Azərbaycana qarşı yallandırılanlar daha çox olardı, elə ordan qaldırırdınız da plakatınızı!
Sonra Tunberqin İrəvana getməsi və “erməni soyqırımı” abidəsi önündə dizini yerə atması...
Get bir ağacın başına dolan, başı kəsik gözəl kötüyün üstündə ağı de – biz də dəminə züy verək! Sən ekofəalsan, yoxsa erməni yalanlarını yalayan?
İnsanlar özlərini bu qədər ifşa etməməlidir; dünya özünü bu qədər iyrənc təqdimatdan çəkinməlidir!
Qəribədir: Bütün maskalar düşüb, hər kəs açıq və həyasızca oynayır, qırmızıcasına üzə deyirlər ki, bax, ermənilərdən pul alıb, bu aksiyanı keçirib, “erməni qoyqırımı”na da baş əyirəm!
Bəs, yaxşı, Vəfa Nağı niyə maskalanır ki?
Kimsə ona niyə demir ki, CO olmağına CO-dur, amma ...VİD19 deyil, ..P29-dur!
