"SOCAR Green" və "Holcim Azerbaijan", Azərbaycanda sənaye əməliyyatlarının ətraf mühitə təsirini azaltmağa yönəlmiş bərpa olunan enerji həllərini inkişaf etdirmək üçün Anlaşma Memorandumu (AM) imzalayıb.
Bu tərəfdaşlıq bərpa olunan enerji və innovativ davamlı texnologiyalar vasitəsilə "Holcim"in istehsal prosesinin dekarbonizasiyasını hədəfləyir və hər iki şirkətin davamlı sənaye təcrübələrinin təşviqi və ətraf mühitə təsirin azaldılmasına sadiqliyini əks etdirir.
Bu Anlaşma Memorandumu, "Holcim"in 2050-ci il üçün qlobal xalis sıfır öhdəliyini dəstəkləyərək, bərpa olunan enerji imkanlarını araşdırmaq üçün çərçivə yaradır. Bu iddialı məqsədlərə çatmaq üçün "Holcim", alternativ yanacaq istifadəsi, dövri iqtisadiyyat təcrübələri və innovativ karbonun tutulması, istifadəsi və saxlanılması texnologiyaları daxil olmaqla, sənaye sahəsində qabaqcıl tədbirlər həyata keçirir.
"Bu tərəfdaşlıq "SOCAR Green" ilə birgə Azərbaycanda dekarbonizasiya məqsədlərimizi dəstəkləmək üçün bərpa olunan enerji imkanlarını araşdırmağa kömək edəcək," - deyə "Holcim Azerbaijan"ın baş icraçı direktoru cənab Xalid Samaka bildirib. "Əməliyyatlarımıza davamlı enerji həllərini inteqrasiya edərək, "Holcim"in qlobal xalis sıfır yolunda əhəmiyyətli addım atırıq və eyni zamanda milli davamlı inkişaf hədəflərini də dəstəkləyirik."
"SOCAR Green"in baş direktoru Elmir Musayev də əməkdaşlıqdan məmnunluğunu ifadə edib: "Holcim Azerbaijan" ilə imzaladığımız Anlaşma Memorandumu, tikinti sektorunda daha yaşıl enerji həllərinin təşviqində əhəmiyyətli bir mərhələdir. Birlikdə "SOCAR Green"in strateji prioritetləri ilə tam uyğun olan davamlı inkişafı irəli aparmaq öhdəliyi daşıyırıq."
Davamlı tikinti sahəsində qlobal lider olan "Holcim"in Azərbaycanın bərpa olunan enerji keçidində lider mövqeyində dayanan "SOCAR Green" ilə tərəfdaşlığı, əməliyyatlarının ətraf mühitə təsirini azaltmağa sadiqliyini vurğulayır və Azərbaycanın daha davamlı, az karbonlu bir gələcəyə dair vizionuna uyğun gəlir. Birlikdə işləyərək, hər iki şirkət sənayedə əhəmiyyətli dəyişikliklər yaratmaq və Azərbaycanın və ondan kənarda davamlı bir gələcəyə töhfə vermək mövqeyindədir.
"Holcim" haqqında
"Holcim", 2023-cü ildə 27,0 milyard CHF xalis satışa malik olan innovativ və davamlı tikinti həlləri sahəsində qlobal liderdir. Bizim 63.448 əməkdaşımız bütün bölgələrimizdə insanlar və planet üçün inkişafı təmin etmək məqsədi ilə çalışır, hər kəs üçün yaşayış standartlarını yaxşılaşdırmağa töhfə verir. Müştərilərimizlə əməkdaşlıq edərək, davamlı tikinti materialları "ECOPact" və "ECOPlanet"dən dövriyyə texnologiyası "ECOCycle®"ə və "Elevate"in qabaqcıl dam örtüyü və izolyasiya sistemlərinə qədər ən geniş çeşiddə qabaqcıl həllər təklif edirik.
"SOCAR Green" haqqında
2024-cü ildə təsis edilmiş "SOCAR Green" ölkənin bərpa olunan enerji keçidinin önündə gedir. "SOCAR Green" günəş, külək və yaşıl hidrogen kimi genişmiqyaslı təmiz enerji təşəbbüslərinin həyata keçirilməsini təmin edir. Bərpa olunan enerji sahəsində beynəlxalq liderlərlə strateji tərəfdaşlıqlar vasitəsilə "SOCAR Green" Azərbaycanın milli iqlim hədəflərinə çatmasına və qlobal dayanıqlı inkişaf məqsədlərinə töhfə verməsinə dəstək olur.
Əlavə edək ki, dekarbonizasiya atmosferə karbon qazının (CO2) çıxarılmasının azaldılması üçün istifadə edilən termindir. Dekarbonizasiya aşağı karbonlu enerji mənbələrindən istifadəyə keçməklə əldə edilir.
