“The New York Times” ABŞ prezidenti Co Baydenin Ukraynaya Amerikanın uzaqmənzilli ATACMS raketlərini Rusiyadakı hədəflərə atmasına icazə verdiyini yazıb. Ukrayna bir ildən artıqdır ki, bu raketlərdən yalnız öz ərazisində istifadə edir və dəfələrlə ABŞ-ı Rusiyaya zərbə endirmək üçün icazə verməyə çağırıb.
ATACMS (Army Tactical Missile System) Ordu Taktik Raket Sistemi deməkdir. Raketlər “Lockheed Martin” tərəfindən istehsal olunur.
ATACMS bir neçə modifikasiyaya malikdir - onlar ya təxminən 250 kq ağırlığında bir döyüş başlığına sahib ola bilər, ya da kaset sursatları daşıya bilər. Onların da müxtəlif uçuş diapazonları var - 165-dən 300 km-ə qədər.
Bu raketlərin buraxılması üçün M270 MLRS və ya HIMARS qurğularından istifadə edilir. Hər ikisi Ukrayna Müdafiə Qüvvələrində mövcuddur.
Məlumdur ki, ATACMS istənilən hava şəraitində və günün istənilən vaxtında fəaliyyət göstərə bilər. Onlar həmçinin hava hücumundan müdafiə sistemləri tərəfindən asanlıqla ələ keçirilmir. Səbəb yüksək sürət (3 Max-ə qədər - təxminən 3675 km/saat) və raketin dik uçuş yoludur.
Bu cür raketlərin qarşısını almaq üçün ruslara S-400/S-300V və “Buk” komplekslərinin ən son modifikasiyaları ilə laylı hava hücumundan müdafiə sistemi lazımdır.
MX-nin eks-spikeri Yuri İqnatın dediyi kimi, bu raketlər xüsusilə Krımdan Ukraynanı atəşə tutan Rusiya raket sistemlərini məhv etməyə imkan verəcək. Məsələn, “Oniks” raketləri istehsal edən “Bastion” kompleksi.
“UA War Infographics” 300 kilometr mənzilli ATACMS raketlərinin hara çata biləcəyini göstərdi. Xüsusilə Kursk bölgəsini əhatə edərək Voronej, Bryansk və Rostov-na-Donuya çatırlar.
Rusiya KİV-nin yazdığı kimi, Ukrayna Silahlı Qüvvələrinin əvvəllər yalnız pilotsuz təyyarələrlə çatdığı ərazilər raketlərin atış məsafəsində ola bilər.
ABŞ prezidenti Co Bayden Ukraynaya Rusiya ərazisinə, xüsusən də Kursk bölgəsində Rusiya və Şimali Koreya qoşunlarına Amerika ATACMS raketləri atmağa icazə verib. “The New York Times” qəzetinin yazdığına görə, bu qərar Rusiyanın Şimali Koreya qoşunlarını döyüşə göndərmək barədə gözlənilməz qərarına “cavab” idi.
Eyni zamanda, “Reuters” xəbər verir ki, yaxın günlərdə ilk uzaq məsafədən zərbələr endiriləcək.
Almaz Həsənli
