COP29 çərçivəsində "Təhsilin yaşıllaşdırılması və iqlim dayanıqlılığı" mövzusunda yüksək səviyyəli panel müzakirəsi keçirilib.
Modern.az xəbər verir ki, panel sessiyası iqlim çağırışlarına cavab kimi təhsildə transformativ yanaşmaların müzakirəsinə həsr olunub.
Elm və təhsil naziri Emin Əmrullayev bildirib ki, əsas məqsəd təhsil çərçivələrini iqlim dayanıqlılığı və fəaliyyətlərinə üstünlük vermək üçün yenidən tənzimləməkdir:
"Bu isə iqlim savadlılığının təhsil standartlarına inteqrasiya olunması və öyrənənlərin iqlim həllərinə fəal şəkildə töhfə verə biləcək bacarıqlarla təmin edilməsi deməkdir".
Müzakirələr zamanı Azərbaycanda STEAM təhsili təşəbbüsünün şagirdlərə "yaşıl enerji" və davamlılıq sahəsində real layihələr üzərində işləməyə imkan yaratdığı da qeyd edilib.
Eyni zamanda, müzakirələrdə iqlimə həssas təhsilin qlobal təşviqində tərəfdaşlığın öhdəliyi bir daha təsdiqlənib və gələcək fəaliyyətlərin əsasən potensialın artırılması, eləcə də biliklərin bölüşdürülməsi istiqamətində olacağı vurğulanıb.
Panel çərçivəsində təşkil edilən "Greening Education Partnership" təşəbbüsünün ikinci illik iclası da öz növbəsində qlobal təhsil liderləri tərəfindən dayanıqlılığın təhsil sistemlərinə inteqrasiyası ilə bağlı müzakirələr aparmaq üçün dinamik platforma rolunu oynayıb.
