Abxaziyada hökumət və müxalifət nümayəndələri “prezident” Aslan Bjaniyanın istefa verdiyini bildirən saziş imzalayıblar.
Senzor.az yerli KİV-ə istinadən bildirir ki, bu barədə Bjaniyanın mətbuat xidmətindən məlumat verilib.
“Ölkədə sabitliyi və konstitusiya quruluşunu qorumaq üçün Abxaziya Respublikası “konstitusiyasının” 65-ci maddəsinə uyğun olaraq, Abxaziya “prezidenti” vəzifəsindən istefa verirəm”, - deyə məlumatda Bjaniyanın ərizəsindən sitat gətirilib. 
Yerli media yazır ki, Abxaziyanın müxalifət lideri Adqur Ardzinba bütün etirazçılara təşəkkür edib və onları evlərinə qayıtmağa çağırıb.
Məsələ ondadır ki, razılaşmaya əsasən, dövlət binalarının ərazisinə və kompleksinə toplaşan vətəndaşlar noyabrın 19-da dağılışmalıdırlar. Buna əməl edilmədiyi təqdirdə Bjaniya istefa ərizəsini geri götürəcək.
Qeyd edək ki, dünən yaydığı bəyanatda Aslan Bjaniya istefa verməyəcəyini açıqlamışdı.
Senzor.az
