Bu gün dünyamıza təsir edən iqlim dəyişikliyi və təbii fəlakətlər digər qlobal ekoloji problemlər ilə birlikdə gələcəyə təhlükə yaradır. Bu vəziyyətdən minimum zərərlə çıxmaq üçün ölkələrin və beynəlxalq ictimaiyyətin bütün səviyyələrdə səylərini birləşdirməsi zəruridir. Azərbaycan ətraf mühitin mühafizəsinə yönəlmiş zəruri qanunvericilik bazasını işləyib hazırlayıb ki, bu da ölkənin öz öhdəliklərini yerinə yetirməsinə şərait yaradıb.
Musavat.com xəbər verir ki, bu fikirləri Ailə, Qadın və Uşaq Problemləri üzrə Dövlət Komitəsinin sədri Bahar Muradova COP29 çərçivəsində keçirilən "Şəffaflıqda Gender" adlı tədbirdə çıxışı zamanı deyib.B.Muradova qeyd edib ki, Dövlət Komitəsi Milli Məclisə illik hesabat təqdim edir: "Bu hesabat gender bərabərliyinin təmin edilməsi üçün il ərzində cəlb olunmuş tərəflər tərəfindən həyata keçirilən əlaqələndirmə fəaliyyətlərinin nəticələrini əks etdirir. Bu proses bizə Azərbaycanın iqlim dəyişikliyi arasında genderlə bağlı hesabatlılığı, şəffaflığı və səmərəliliyi artırmağa, qadınların ekoloji məsələlərə çıxışını təmin etməyə və kömək edir. Biz bu məsələyə həssas yanaşırıq".
B.Muradova diqqətə çatdırıb ki, BMT Təşkilatının tərəfdaşlığı ilə yaradılmış Qadın Resurs Mərkəzlərinin davamlılığı hazırda Dövlət Komitəsi tərəfindən təmin edilir: "Azərbaycanda əhalinin 48%-i kənd təsərrüfatı ilə məşğuldur, bunun 49%-ni qadınlar,
51%-ni isə kişilər təşkil edir.
Təşəbbüslərin dəstəklənməsi bizə gender bərabərliyini iqlim dəyişikliyi siyasətimizin bir hissəsinə çevirməyə və daha güclü və daha inklüziv cəmiyyət qurmağa aparmağa imkan verir. Ümid edirəm ki, hər biriniz bu səylərə və məqsədlərə qoşulacaqsınız.
Nigar HƏSƏNLİ,
Musavat.com
