Əmək və Əhalinin Sosial Müdafiəsi Nazirliyinin yanında Dövlət Sosial Müdafiə Fondu (DSMF) Prezident İlham Əliyevin 17 aprel 2023-cü il tarixli fərmanı ilə təsdiq edilmiş "Sərbəst vəsaitinin investisiyaya yönəldilməsi və investisiya gəlirlərindən istifadə edilməsi Qaydası”na əsasən 2023-cü ilin I yarısından başladığı fəaliyyəti 2024-cü ildə də davam etdirib.
Bu barədə Hesablama Palatasının Fondun 2025-ci il büdcəsi haqqında qanun layihəsinə verdiyi rəydə bildirilir.
Sənədə əsasən, ötən ilin I yarısında 30 milyon manat banklarda açılmış depozit hesablarına, 402,7 milyon manat dövlət zəmanətli istiqrazlara, 167 milyon manat isə müvafiq qiymətli kağızlar üzrə əks-repo əməliyyatlarına yönəldilməklə ümumilikdə 599,7 milyon manat vəsait investisiya edilib. Ümumilikdə ilin sonuna banklarda açılmış depozit hesablarına 52,5 milyon manat, dövlət zəmanətli istiqrazlara 997,5 milyon manat, banklarda həyata keçirilən əks-repo əməliyyatlarına isə 1 milyard 465,3 milyon manat vəsait investisiya olunub. Ötən il investisiya fəaliyyəti üzrə 5,9 milyon manat gəlir əldə edilib, bunun da 252,8 min manatı komissiya və xidmət haqqı kimi ödənilib.
