Azərbaycan BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına (COP29) uğurla ev sahibliyi edib. Ancaq bəzi dövlətlər və təşkilatlar tədbirin Bakıda keçirilməsinə xoşagəlməz yanaşma sərgiləməklə özlərinin humanitar məsələlərə mənfi münasibətlərini ifşa etdilər.
Fransa kimi özünü mədəni dünyanın təmsilçisi sayan bir dövlətin beynəlxalq tədbiri boykota çağırışı fiaskoya uğradı. Yaxud sülhdən, Azərbaycanla münasibətlərin normallaşmasından ancaq danışmağı bacaran Ermənistan hakimiyyətinin sessiyada iştirak etməməsi rəsmi İrəvanın ikiüzlülüyünü, etibarsızlığını təsdiqləyib. COP29-un Bakıda keçirilməsinə razılıq verdiyi halda, Yelisey sarayının siyasi ambisiyalarına uyaraq prezident Emmanuel Makrona təəssübkeşlik etməklə Ermənistan hakimiyyəti sülhə, normallaşmaya, ikitərəfli münasibətlərin qurulmasına hələ də hazır olmadığını nümayiş etdirib.
Qısa xatırlatma. 2023-cü il dekabrın 11-də Birləşmiş Ərəb Əmirliklərində COP28-də COP29-un Şərqi Avropa Qrupunun üzvü olaraq Azərbaycanda keçirilməsinə dair qərar qəbul edilib. Bu, Azərbaycan dövləti və Prezident İlham Əliyevin beynəlxalq aləmdə nüfuzunun göstəricisi idi. Çünki ölkənin namizədliyi böyük səs çoxluğu ilə qəbul olunmuşdu.
Sessiyanın Bakıda keçirilməsi Azərbaycanın bir sıra beynəlxalq tədbirlərə uğurla ev sahibliyi etməsinə görə göstərilən etimad idi. Azərbaycan pandemiya dövründə etdiyi humanitar yardımlar və keçirdiyi videokonfransla da bunu isbatlamışdı.
Qeyd edək ki, Azərbaycan BMT-nin İqlim Dəyişmələri üzrə Çərçivə Konvensiyasına tərəf olmaqla qlobal iqlim dəyişmələrinə qarşı mübarizəyə qoşulub. Respublika 1990-cı illə müqayisədə 2030-cu ilə qədər istixana qazlarının miqdarını 35 faiz azaltmağı qarşısına məqsəd qoyub. 2050-ci ilə qədər istixana qazlarının miqdarını 40 faiz azaldılması da başlıca hədəflərdəndir.
Prezident İlham Əliyev işğaldan azad edilmiş Azərbaycan torpaqlarını “Yaşıl enerji” zonası elan edib. Bu ərazilərin 2050-ci ilədək “Netto sıfır emissiya” zonasına çevrilməsi nəzərdə tutulub.
Bu, iqtisadiyyatı inkişaf etmiş ölkələrə də özünəməxsus ismarış sayıla bilər.
Azərbaycan tədbirə uğurla ev sahibliyi etməklə beynəlxalq ictimaiyyətin bir daha etimadını və etibarını qazanıb. COP29 dövlətin artan nüfuzuna daha bir çalar qatıb. Qonaqların qəbulu, onların yerləşdirilməsi, təhlükəsizliyinin təmin edilməsi və başqa məsələlər uğurlu təşkilatçılığa örnək ola bilər.
Prezident İlham Əliyev noyabrın 12-də Bakıda COP29-un Liderlər Sammitinin açılış mərasimindəki çıxışında bildirmişdi: “Bizim 196 ölkədən 72 min qeydiyyata alınmış iştirakçımız var. Onların arasında 80 prezident, vitse-prezident və baş nazir var. Beləliklə, dünya Bakıda toplaşıb və biz dünyaya deyirik ki, “Azərbaycana xoş gəlmisiniz!”.
COP29 bir daha sübut etdi ki, Azərbaycan dünyada böyük nüfuza malik, beynəlxalq ictimaiyyətin gözündə etibar, hörmət qazanmış dövlətdir. Rəsmi Bakı sessiyanı uğurlu təşkil etməklə ona etimad edənlərin də ümidlərini doğrultmuş oldu. Bu, çoxlu sayda dövlət və hökumət başçılarının, onminlərlə qonağın tədbirdə iştirakında və təşkilatçıya ünvanladıqları xoş sözlərdə də əksinin tapıb. Bununla da COP29 ən çox dövlət və hökumət başçılarının iştirak etdiyi tədbirlərdən biri olub. Sessiyanın sonrakı günlərində 76 min nəfərin qeydiyyatdan keçməsi dünya iqlim konfranslarının tarixində yeni rekord sayılır.
Beləliklə, Azərbaycan bu qlobal toplantını uğurla təşkil etməklə daha bir sınaqdan uğurla çıxıb.
Sədrəddin İsmayılov,
Report.az
