ABŞ və Yaponiya silahlı qüvvələri dekabr ayı ərzində Tayvanda hərbi böhran baş verəcəyi təqdirdə, birgə əməliyyatların ilk planını hazırlamaq niyyətindədirlər. Bu plana qonşu Filippində Amerika raket qüvvələrinin yerləşdirilməsi daxildir.
Teleqraf.com xəbər verir ki, bu barədə "Kyod" agentliyi öz mənbələrinə istinadən bildirib.
Məlumata görə, ABŞ Dəniz Piyadaları Korpusunun sahil alayının, xüsusən də "HIMARS" reaktiv buraxılış sistemləri ilə təchiz edilmiş ayrı-ayrı bölmələri Yaponiyanın Kyuşu adasındakı Kaqosima prefekturası ilə Okinava prefekturasının ekstremal cənub-qərbi arasındakı adalarda geniş şəkildə yerləşdiriləcək. Yaponiya Silahlı Qüvvələri onlara sursat və yanacaqla maddi-texniki dəstək verəcək.
Filippinin şimalında paralel olaraq Amerika raket bölmələri, kosmik rabitə və rəhbərlik, kiber və elektron müharibə qrupları yerləşdiriləcək. Aprel ayından etibarən Typhon yerüstü mobil qurğuları orada yerləşdirilib, onların köməyi ilə uzun mənzilli "Tomahawk" qanadlı raketləri və "SM-6" çoxfunksiyalı raketləri buraxa bilərlər. Onlar qurudakı hədəfləri vurmaq, həmçinin hava hədəfləri və ballistik hədəfləri məhv etmək üçün istifadə edilə bilər.
Vaşinqton və Manila 2023-cü ilin fevralında Filippində daha dörd hərbi obyektin ABŞ Silahlı Qüvvələrinin istifadəsinə verilməsi barədə razılığa gəliblər. Onların hazırda ölkədə ümumilikdə doqquz dayaq nöqtəsi var. Böhran zamanı belə obyektlər şəbəkəsi ABŞ Hərbi Dəniz Qüvvələrinin təyyarədaşıyan zərbə qruplarının regionda yerləşdirilməsi ilə tamamlanacaq.
