BMT-nin iqlim dəyişikliyi üzrə COP29 konfransında 2035-ci ilə qədər inkişaf etməkdə olan dövlətlər üçün 300 milyard dollarlıq yeni iqlim hədəfi barədə razılığa gəlinməsi bütün dünya ölkələri, xüsusən də Ukrayna üçün zəngin və kifayət qədər mürəkkəb strateji sazişdir. SİA xəbər verir ki, bu barədə Ukraynanın ətraf mühitin mühafizəsi və təbii sərvətlər naziri Svetlana Qrinçuk nazirliyin saytına açıqlamasında bildirib.
"Paris sazişinin 6-cı maddəsi - bazar mexanizmləri ilə bağlı qərarlar paketi qəbul edilib. Kənd təsərrüfatı üzrə iş proqramı davam etdirilib və yeni layihələrin təqdim edilməsi üçün portal yaradılıb. Qlobal uyğunlaşma məqsədinə nail olmaq üçün hazırlıq istiqamətində addımlar atılıb”, - deyə nazir əlavə edib.
Qrinçuk nəticələrin Ukrayna üçün nə demək olduğunu da bildirib: “Biz iqlim planlarımızı və layihələrimizi həyata keçirmək üçün vəsait alacağıq. Biz əlavə 6-cı maddəyə investisiya cəlb edə, həmçinin yaşıl enerji, yaşıl bərpa və iqlim dəyişikliyinə uyğunlaşma üçün beynəlxalq maliyyə institutlarının maliyyələşdirilməsində iştirak edə bilərik”.
Nazirin sözlərinə görə, Ukrayna pavilyonu müharibə və dağıntılara baxmayaraq, beynəlxalq tərəfdaşları yaşıl bərpaya cəlb etmək missiyasını yerinə yetirən Bakıda işin mühüm elementi oldu. "Bu, COP29 başa çatdıqdan sonra belə, Ukrayna ətrafında dünyanın birliyinin simvolu olacaq", - deyə nazir əlavə edib.
