Avropa İttifaqı Rusiyaya qarşı 45-dən çox neft tankerinə təsir edəcək yeni sanksiyalar paketi hazırlayır...
Poliqon xəbər verir ki, bubarədə Bloomberg Agentliyi məlumat yayıb. Agentliyin yazdığına görə, yeni sanksiya paketinə həmçinin 50-yə yaxın şəxsin Birliyə girişinə qadağa qoyulması və 30-a yaxın təşkilatın aktivlərinin dondurulması daxildir.
Bloomberg-in istinad etdiyi sənədlərdə deyilir ki, 15-ci sanksiyalar paketi çərçivəsində Avropa Komissiyası Rusiya neft tankerlərinin Avropa limanlarına daxil olmasını və “riskli daşımalara” girişi qadağan etməyi planlaşdırır. Eyni zamanda vurğulanır ki, məhdudiyyətlərin yekun dəsti hələ də müzakirə olunur və sonradan dəyişdirilə bilər.
Sanksiyalar neft nəql edən Rusiya şirkətlərinə, eləcə də bu təşkilatların rəhbərlərinə, eləcə də hərbi texnika istehsalçılarına da təsir edəcək. Siyahıya İran, Hindistan, Çin, BƏƏ, Tailand və Serbiyadan olan firmalar daxil ola bilər ki, onlar Aİ-nin fikrincə, Rusiyaya ikili təyinatlı texnologiyalar, xüsusən də dronların istehsalı üçün komponentlər əldə etməyə kömək edir.
Bundan əlavə, Brüsselin Rusiya ərazisinə hərbi personal göndərməkdə şübhəli bildiyi Şimali Koreya hərbi rəsmilərinə qarşı məhdudiyyətlərin tətbiqi planlaşdırılır.
Qeyd edək ki, Aİ-yə üzv ölkələrin daimi nümayəndələri noyabrın 27-də Rusiyaya qarşı yeni sanksiyalar paketinin müzakirəsinə başlayacaqlar. Xarici media paketin bu ilin sonuna qədər qəbul oluna biləcəyini yazıb.
Poliqon.info
