Azərbaycan Memarlıq və İnşaat Universiteti üçün yeni korpus binası tikiləcək. Belə ki, bina Bakı şəhəri, Yasamal rayonu, A.Sultanova küçəsi, 11 ünvanında yerləşəcək. Həmçinin, Xəzər Universitetinin yeni korpusunun tikintisi üçün Buzovnada 27 hektar ərazi ayırılıb.
Bəs görəsən, başqa hansı universitetlərin yeni korpusu olacaq?
Modern.az xəbər verir ki, AzEdu.az Təhsil Portalı mövzu ilə bağlı universitetlərə soğru ünvanlayıb.
Azərbaycan Dövlət İqtisad Universitetindən (UNEC) bildirilib ki, yeni korpusun tikilməsi nəzərdə tutulmayıb:
"Lakin yeni yataqxananın tikilməsi planlaşdırılır".
Azərbaycan Dövlət Pedaqoji Universitetdən (ADPU) verilən məlumata əsasən, Azərbaycan Dövlət Pedaqoji Universitetinin hazırda 5 rayonda filialı (Quba, Şamaxı, Şəki, Ağcabədi, Cəlilabad) mövcuddur:
"Eyni zamanda Bakı şəhərində 5 fərqli tədris binasında təlim-tədris prosesi təşkil edilir. Yaxın gələcəkdə Pedaqoji Universitetin yeni filial və ya tədris korpusunun yaradılması nəzərdə tutulmur".
Bakı Avrasiya Universitetindən (BAAU) qeyd edilib ki, Bakı Avrasiya Universitetinin (BAAU) hazırda bir tədris korpusu, bir də yataqxanası mövcuddur:
"Həmçinin, tədris korpusunun tərkibində Bakı Avrasiya Kolleci (BAAK) də fəaliyyət göstərməkdədir. Hazırda BAAK üçün ayrıca tədris korpusu tikilməkdədir. BAAU üçün ayrıca korpusun tikilməsi yaxın tarix üçün planlaşdırılmayıb"
Azərbaycan Turizm və Menecment Universitetindən (ATMU) bildirilib ki, hazırda Azərbaycan Turizm və Menecment Universiteti (ATMU) 2 tədris binasında fəaliyyət göstərir:
"Yaxın gələcəkdə müasir tələblərə cavab verən yeni tədris korpusunun inşaası istiqamətində isə davamlı müzakirələr aparılır".
Qərbi Kaspi Universitetindən verilən məlumat əsasən, son illərdə Universitetin qəbul apardığı ixtisasların sayının, qəbul planın artması, həyata keçirdiyi yeni layihələrlə əlaqədar olaraq infrastrukturunu, maddi-texniki bazasını da buna uyğunlaşdıraraq, genişləndirib:
"İki yeni tədris binası, bir neçə elmi-tədqiqat mərkəzi yaradılıb. Yeri gəlmişkən, bu tədqiqat mərkəzlərindən üçü bölgələrdədir. Ümumilikdə isə planda kampusun tikintisi var".
Azərbaycan Texniki Universitetdən bildirilib ki, gələcəkdə bu istiqamətdə hər hansı yenilik olacaqsa ictimaiyyətə açıqlanacaq.
ADA Universitetindən məlumat verilib ki, yaxın gələcəkdə Şəki və Gəncə kampusları fəaliyyətə başlayacaq:
"Eyni zamanda, İtaliya-Azərbaycan Universitetinin kampusu da yaxın tarixdə öz tələbələrini qarşılayacaq".
Mingəçevir Dövlət Universitetindən bildirilib ki, universitetinin 7 hektarlıq ərazidə kampusu-şəhərciyi tikilməkdədir:
"Tikinti layihəsinin tərkibində tədris, inzibati, idman zalı, tələbə-müəllim yataqxanası, kitabxana, hotel və peşə mərkəzinin binaları nəzərdə tutulub. Kampus-şəhərcik 10 min tələbə üçün planlaşdırılıb".
