2025-ci ildə Azərbaycanın dövlət büdcəsinin sosial xərcləri təxminən 10 milyard ABŞ dolları təşkil edəcək ki, bu da Gürcüstan və Ermənistanın birgə sosialyönümlü büdcə xərclərindən 2,5 dəfə çoxdur.
Report xəbər verir ki, bunu deputat Vüqar Bayramov Milli Məclisin bu gün keçirilən plenar iclasında bildirib.
O, həmçinin qeyd edib ki, gələn il sosial xərclərimizin Ermənistanın ümumilikdə büdcə xərclərindən 67% çox olacağını vurğulayıb:
"Bu rəqəmlər reallığı daha düzgün qiymətləndirməyə imkan verir".
Bundan başqa, deputatın sözlərinə görə, 2021-ci illə müqayisədə sosial xərclərdə 5 milyard manata yaxın artım var:
"Vətən Müharibəsi başa çatdıqdan sonra 2021-ci ildə sosial xərclər 12,2 milyard manat olubsa, 2022-ci ildə 13,7 milyard manat, 2024-cü ildə isə 15,5 milyard manat təşkil edib, 2025-ci ildə isə 16,9 milyard manat nəzərdə tutulub. Beləliklə, 2021-ci illə müqayisədə sosial xərclərdə 4,7 milyard manat artıq proqnozlaşdırılır".
V.Bayramov əlavə edib ki, Azərbaycan həmçinin işğaldan azad etdiyi ərazilərinin yenidən qurulmasına vəsait ayırır. İndiyə qədər bu istiqamətdə 18 milyard manat xərclənib. Gələn il nəzərdə tutulan vəsaiti də nəzərə alsaq, bütövlükdə 22 milyard manat vəsait həmin ərazilərə sərf olunacaq.
