“Liverpul”un baş məşqçisi Arne Slot ispan mütəxəssis Xosep Qvardiolanın çalışdırdığı komandaların futbolunu niyə bəyəndiyini açıqlayıb.
Arena.az nüfuzlu italyan jurnalist-insayder Fabritsio Romanoya istinadən, niderlandlı mütəxəssisin bu barədə fikrini təqdim edir:
“Futbolda çox az məşqçi var ki, onların komandalarının oyununa baxsanız, sizi heç vaxt pərişan etməyəcək. “Barselona”, “Bayern” və ya “Mançester Siti”nin 10 oyunundan 9-u futbolu sevən hər kəsə zövq bəxş edir. Buna görə də onun komandalarının oyununu izləməyi xoşlayıram”, deyə Arne Slot vurğulayıb.
Xatırladaq ki, “Liverpul” “Mançester Siti”ni bu gün – dekabrın 1-də “Enfild”də qəbul edəcək. Hakim oyunu Bakı vaxtı ilə saat 20:00-da başladacaq.
Vurğulayaq ki, qarşıdakı oyun turun mərkəzi oyunu olaraq əlamətdardır. 12 turdan sonra “Liverpul” 31 xalla Premyer Liqanın yarış cədvəlinin zirvəsində qərarlaşıb. “Mançester Siti” isə 23 xalla 4-cü yerdədir.
