Cənubi Koreyanın yarımkeçirici sənayesinin pioneri olan "Samsung Electronics" süni intellekt (AI) texnologiyalarına yönəlmiş qlobal yaddaş bazarında mühüm çətinliklərlə qarşılaşır.
Valyuta.Az Cənubi Koreya mediasına istinadən xəbər verir ki, şirkətin dünyanın aparıcı yaddaş çip istehsalçısı kimi otuzillik hakimiyyəti, süni intellekt sürətləndiricilərinin mühüm komponenti olan yüksək genişzolaqlı yaddaşa (HBM) artan tələbatın gecikmiş cavabı səbəbindən təzyiq altındadır.
Texnologiya nəhəngi, mərhum sədr Li Kun-hi tərəfindən irəli sürülmüş proqram çərçivəsində, 1974-cü ilin dekabrında "Korea Semiconductor" şirkətini satın alaraq yarımkeçirici biznesinə daxil olmuş və qısa müddətdə sənaye lideri kimi mövqeyini möhkəmləndirmişdir.
1983-cü ildə şirkət ilk 64 kilobaytlıq "DRAM" çipini hazırlamış, 1992-ci ildə sənayenin ilk 64 meqabitlik "DRAM"ı və 1996-cı ildə dünyanın ilk 1 gigabitlik "DRAM"ı kimi irəliləyişlərə nail olmuşdur.
Sonrakı illərdə "Samsung Electronics" 2011-ci ildə 20 nanometrlik (nm) "DRAM", 2016-cı ildə 10 nm sinfində "DRAM" və 2022-ci ildə dünyanın ilk 3 nm çip istehsalını həyata keçirməklə innovativ yanaşmalar sayəsində "DRAM" bazarında 30 illik üstünlük əldə etmişdir.
Lakin süni intellekt inqilabı ilə bağlı yaranmış böyük dəyişikliklər ənənəvi yaddaş bazarını sarsıdıb və tələbat ümumi təyinatlı "DRAM"lardən süni intellekt üçün optimallaşdırılmış çiplərə, o cümlədən "HBM"lərə yönəlib.
"Samsung Electronics" bu sürətlə dəyişən trendlərə hazırlaşmaqda ləngiyib və "HBM" texnologiyasına rəqiblərindən daha az sərmayə qoyub.
Əksinə, "SK hynix" bu texnologiyaya aqressiv şəkildə sərmayə qoyaraq, süni intellekt sürətləndiricilərinin dominant istehsalçısı olan "Nvidia"ya "HBM" çipləri tədarük etməklə demək olar ki, monopoliya qazanıb.
Son bazar məlumatlarına əsasən, "Samsung Electronics" 2024-cü ilin üçüncü rübündə "DRAM" bazarında 41,1 % payla lider olsa da, bu göstərici 2022-ci ilin sonunda, "HBM" bazarının açılmasından əvvəlki 45,1 %-dən azalmışdır.
Eyni dövrdə "SK hynix" isə "HBM" çiplərinin uğurlu satışı sayəsində bazar payını 27,7 %-dən 34,4 %-ə qədər artırmışdır.
Oktyabr ayında III rübün maliyyə nəticələrini açıqladıqdan sonra "Samsung Electronics" zəif göstəriciləri və qarşılaşdığı çətinliklər səbəbindən ictimaiyyət qarşısında üzr istəməyə məcbur olub. Bu, şirkətin nadir hallarda atdığı bir addımdır.
"Samsung Electronics"in texnologiya lideri imicinə "HBM"in rəqabət qabiliyyətinin zəifləməsi zərər vurub" - deyə, "Eugene Investment & Securities Co." şirkətinin analitiki Li Sun-qu bildirib.
"Ola bilsin ki, "Samsung" əsas rəqabət qabiliyyətini bərpa etmək üçün gözləniləndən daha çox vaxt sərf edəcək, lakin bu, şirkətin problemi gizlətmək əvəzinə müzakirə etməsi ilə müsbət dəyişikliklərin başlanğıcıdır."
Üstünlüyünü bərpa etmək məqsədilə "Samsung Electronics" diqqətini "HBM" inkişafına yönəldib və rəqibləri ilə fərqi aradan qaldırmağa çalışır.
Şirkət beşinci nəsil "HBM3E" çiplərini "Nvidia"ya çatdırmağı prioritet hesab edir və gələn ilin II yarısında altıncı nəsil "HBM4" çiplərinin kütləvi istehsalına başlamağı planlaşdırır.
Bundan əlavə, "Samsung Electronics" süni intellekt serverləri üçün vacib olan "compute express link", yaddaşda emal və korporativ SSD-lər kimi inkişaf etməkdə olan yaddaş texnologiyalarına sərmayəni genişləndirir.
Mütəxəssislər bildirirlər ki, şirkətin çətinlikləri texnoloji özünəinamdan qaynaqlanıb və "Samsung"un şirkət daxilində azad və açıq müzakirə mühiti yaratmasının, həmçinin sənayedə etimadı yenidən qurmasının vacibliyini vurğulayırlar.
"Bu anda uzunmüddətli sərmayələrdən daha çox, sənaye daxilində etimadı və həmrəyliyi bərpa etmək lazımdır" – deyə, Seulun "Sangmyung" Universitetinin biznes idarəçiliyi üzrə professoru So Ci-yong bildirib və "Samsung"un "SK hynix" və "TSMC" kimi rəqiblərindən öyrənməsinin vacibliyini qeyd edib.
Rəhim
