Ehtimal olunur ki, virus qəza nəticəsində sızıb və geniş yayılıb
ABŞ Konqresinin komitəsi COVID-19 virusunun laboratoriyada yaradılaraq sızması nəzəriyyəsini dəstəkləyib.
Dekabrın 2-də yayımlanan hesabatda, Respublikaçıların nəzarətində olan Nümayəndələr Palatasının Koronavirus Böhranı üzrə Seçilmiş Alt Komitəsi, koronavirusun "ehtimal ki, laboratoriya və ya tədqiqatla əlaqəli qəza nəticəsində ortaya çıxdığı” qənaətinə gəldiyini açıqlayıb.
Hazırlanması iki il davam edən 520 səhifəlik hesabatda pandemiyaya federal və əyalət səviyyəsində cavab tədbirləri, həmçinin onun mənşəyi və peyvənd cəhdləri nəzərdən keçirilib.
"Bu iş ABŞ-a və dünyaya növbəti pandemiyanı proqnozlaşdırmağa, ona hazırlaşmağa, özümüzü qorumağa və qarşısını almağa kömək edəcək”, – Respublikaçı sədr Brad Venstrap Konqresə göndərdiyi məktubda bildirib.
Hesabatın başlıq nəticələri arasında ABŞ Milli Sağlamlıq İnstitutunun Çinin Uhan Virusologiya İnstitutunda viruslarla mübarizə yollarını tapmaq üçün gücləndirən mübahisəli "funksiya qazanma” tədqiqatını maliyyələşdirməsi də var.
COVID-19 halları ilk dəfə 2019-cu ilin dekabrında Çinin mərkəzi Hubei əyalətində yerləşən Uhanda müəyyən edilib.
Bu şəhərin virusun ilk ortaya çıxdığı yer olduğuna inanılır.
Virus sürətlə bütün dünyaya yayılıb və 7 milyondan çox insanın ölümünə səbəb olub.
Ölkələr quru və hava sərhədlərini bağlayıb, bu da qlobal iqtisadiyyatda qarışıqlıq yaradıb.
ABŞ federal agentlikləri, Ümumdünya Səhiyyə Təşkilatı və dünya üzrə elm adamları COVID-19-un mənşəyini müəyyən etməyə çalışsalar da, konsensus əldə olunmayıb.
Bir çox tədqiqatçı virusun heyvanlardan insanlara keçdiyinə inanır və Uhandakı bazardan yoluxmuş olma ehtimalını irəli sürür.
Ümumdünya Səhiyyə Təşkilatı (ÜST) 2023-cü il mayın 5-də pandemiyanın başa çatdığını elan edib.
Lakin Azərbaycanda 2020-ci ildən etibarən pandemiya ilə əlaqədar xüsusi karantin rejimi davam etdirilir.
Ölkənin quru sərhədləri hələ də açılmayıb.
Baş nazir Əli Əsədov 2024-cü il sentyabrın 25-də karantin rejiminin müddətini yenidən uzadıb.
Azərbaycanda xüsusi karantin rejimi 2025-ci il yanvarın 1-nə kimi davam edəcək.
