“Nyu-York Mets”in beysbolçusu Xuan Soto klubu ilə dünya idman tarixində rekord müqavilə imzalayıb.
Referans.az xəbər verir ki, 26 yaşlı dominikanlı “metropolitenlər”lə sözləşməsinin müddəti 15 illikdir. Bu barədə ESPN məlumat yayıb.
Anlaşmanın ümumi dəyəri 765 milyon dollar (illik həddi 51 milyon dollar) təşkil edəcək. Bu müqavilə təkcə Beysbol Böyük Liqasının deyil, bütün idman dünyasının tarixində ən böyük anlaşma olacaq.
Sotodan əvvəl tarixdəki ən böyük müqavilə Şohey Ohtaninin “Los Anceles Dodcers” ilə müqaviləsi idi. Yapon idmançı Sakit okean sahillərində çıxışına görə 700 milyon dollar qazanacaq.
“Sportrac”ın məlumatına görə, Xuan Soto karyerasında indiyədək 82,3 milyon dollar qazanıb.
