“Rusiyada 11,8 milyon insan yaşayış minimumundan aşağı gəlirlə yaşayır ki, bu da hazırda ayda 15 min 679 rubl təşkil edir”.
“AzPolitika” xəbər verir ki, bu məlumatları “Rosstat” dərc edib. Statistikalar Rusiya tərəfindən ilhaq edilmiş Krım nəzərə alınmaqla verilir, Ukraynanın işğal olunmuş əraziləri bura daxil deyil.
“Rosstat” hesab edir ki, 2023-cü ilin eyni dövrü ilə müqayisədə hazırda yoxsulluq həddində yaşayan rusiyalıların sayı iki milyon nəfər azdır.
“The Insider” analitikləri isə hesab edirlər ki, statistikanın manipulyasiyası nəticəsində bu rəqəm yoxsulların real sayından xeyli aşağıdır.
Ukraynada genişmiqyaslı müharibə başlayandan dərhal sonra yoxsulluq kəskin şəkildə artıb, lakin “Rosstat”-ın məlumatlarında bu, görünmür. Səbəb 2021-ci ildə “Rosstat”-ın yoxsulluğun azaldılması ilə bağlı prezidentin fərmanına əməl etmək üçün hesablama metodologiyasını dəyişdirməsidir.
İndi rəsmi statistikanın əsas meyarı – “yoxsulluq həddi” ötən ilin dördüncü rübündə minimum ərzaq səbətinin dəyərinin inflyasiyaya vurulması ilə müəyyən edilir. İnflyasiya yoxsul insanların adətən istehlak etmədiyi yüzlərlə mal və xidmətlərin qiymətləri əsasında hesablanır.
“Beləliklə, yoxsulluq həddini hesablayarkən, yaşamaq üçün lazım olan gəlir ilkin olaraq düsturların manipulyasiyası səbəbindən lazımınca qiymətləndirilmir”, nəşr qeyd edir. “The Insider” yazır ki, əvvəlki metodologiyadan istifadə etsək, onda məlum olur ki, 2023-cü ilin sonunda Rusiyada hakimiyyətin qəbul etdiyindən 1.5 dəfə çox yoxsul insanlar var – onların sayı 15 milyondan 18 milyona qədərdir.
Hesablama metodologiyasının dəyişdirilməsinə qədər yoxsulluğun səviyyəsi yaşayış minimumundan aşağı olan əhalinin xüsusi çəkisi kimi müəyyən edilirdi. Özü də istehlak səbətinin dəyəri əsasında rüblük hesablanırdı.
Əvvəllər “Superjob” sorğuları göstərib ki, real yoxsulluq həddi indikindən üç dəfə yüksək səviyyədə - 43 min rubl müəyyən edilməlidir. Beləliklə, Moskvada “kasıb” olmamaq üçün aylıq 45 min rubl, Sankt-Peterburqda 41 min rubl gəlir lazımdır.
“AzPolitika.info”
