Dünyanın ən varlı adamlarından biri olan Ceff Bezosa məxsus Amerika onlayn pərakəndə satış şirkəti “Amazon” ABŞ-nin yeni seçilmiş prezidenti Donald Trampın andiçmə fonduna 1 milyon dollar ianə vermək niyyətindədir.
Yeniavaz.com xəbər verir ki, bu barədə “The Wall Street Journal” (WSJ) qəzeti məlumat yayıb.  
Onun məlumatına görə, Mark Zukerberqin rəhbərlik etdiyi “Meta” Korporasiyası əvvəllər eyni məbləği Tramp Fonduna göndərib.
Qəzet qeyd edir ki, Bezos və digər texnologiya şirkətlərinin rəhbərləri respublikaçıların yeni administrasiyası ilə münasibətləri yaxşılaşdırmağa çalışırlar. Vəsait ayırmaq qərarı “Amazon” tərəfindən bir neçə gün əvvəl qəbul edilib və artıq Trampın keçid komandasına məlumat verilib.
Bundan əlavə, qəzetin mənbələrinin məlumatına görə, “Amazon Prime Video” axın platforması gələn il yanvarın 20-də Trampın andiçmə mərasimini yayımlayacaq ki, bu da növbəti 1 milyon dollarlıq ianə sayıla bilər.