Bakı, 13 dekabr, AZƏRTAC
Təhsil sahəsində xüsusi proqramları və layihələri davam etdiririk.
AZƏRTAC xəbər verir ki, bunu İnnovasiya və Rəqəmsal İnkişaf Agentliyinin (İRİA) sədri İnarə Vəliyeva dekabrın 13-də qurumun ilin yekunlarına və innovasiya sahəsində fəallığı ilə seçilən oyunçuların mükafatlandırılmasına həsr olunmuş “Digital.Azerbaijan: Nailiyyətlər və IDDA Awards 2024” mərasimində çıxışı zamanı deyib.
Agentlik sədri qeyd edib ki, İRİA-nın təqaüdləri sayəsində Azərbaycanın regionlarında da insanlar həyatını müsbət istiqamətdə dəyişib. Həmçinin aztəminatlı ailələrə Agentlik dəstək göstərir: “İRİA-nın təqaüdü nəticəsində Qəndab Məmmədova hazırda İngiltərənin Harvard Universitetində Astrofizika fakültəsində təhsilini davam etdirir. Növbəti təqaüdçümüz Ülviyyə Cəfərova Laçında İKT işləri üzrə əlaqələndirici vəzifəsi tutur. Biz çalışırıq ki, bu cür uğurlu layihələrin sayı çox olsun. Bu istiqamətdə Elm və Təhsil Nazirliyi ilə əməkdaşlıq davam etdirilir”, - deyə İ.Vəliyeva əlavə edib.
