Fransalı keçmiş müdafiəçi Patris Evra “Əl-Nəsr”in portuqal ulduz hücumçusu Kristiano Ronaldonun PSJ-yə keçmək istəyi ilə bağlı danışıb.
Arena.az “RMC Sport” dərgisinə istinadən, Evranın bu barədə fikrini təqdim edir:
“Kristiano nə vaxtsa PSJ-yə keçmək istəyibmi? Bəli. PSJ, “Arsenal”la danışıqlar olub… Bu, “Yuventus”la müqavilə bağlamazdan əvvəl idi. Onun “Çelsi”, “Yuventus” və PSJ ilə seçimləri vardı. O, heç vaxt “Arsenal”a keçməyəcəyini bildirmişdi. Amma PSJ layihəsi onu maraqlandırırdı. Kristianonu tənqid etmək olardı, amma o, uyğunlaşardı. O, səy göstərəcəkdi. Baxın görün, o, Səudiyyə Ərəbistanında nələr edir. O, artıq əsl səudiyyəlidir!”, deyə Evra vurğulayıb.
Xatırladaq ki, Evra və Ronaldo vaxtilə birlikdə “Mançester Yunayted”də çıxış ediblər.
Kristiano Ronaldo 2023-cü ilin yanvar ayından “Əl-Nəsr”də çıxış edir. Portuqal ulduz ərəb klubuna 2023-cü ilin yanvarında “Mançester Yunayted”dən azad agent qismində keçib.
Ronaldonun “Əl-Nəsr”lə müqaviləsi 2025-ci ilin iyun ayının sonuna qədər qüvvədədir.
Cari mövsümdə Ronaldo “Əl-Nəsr”in heyətində 19 oyuna 16 qol və 3 məhsuldar ötürmə ilə fərqlənib. Kristianonun “Əl-Nəsr” karyerası ümumilikdə 83 oyun, 74 qol və 18 məhsuldar ötürmədən ibarətdir.
Ronaldo “Əl-Nəsr”dən öncə “Real”, “Mançester Yunayted”, “Yuventus”, “Sportinq” (Lissabon) komandalarında çıxış edib. Portuqal ulduz bu komandaların hər biri ilə çoxsaylı qənimətlər qazanıb, müxtəlif rekordlara imza atıb. Ronaldo “Əl-Nəsr”lə də Ərəb Klublarının Çempionlar Kubokunu (2023) qazanıb, həmçinin Səudiyyə Ərəbistanı Peşəkar Liqasının 2023/2024-cü illər mövsümünün ən sərrast qolçusu (35 qol) olub.
Kristiano Portuqaliya yığmasının heyətində 215 oyuna 135 qol vurub və 45 məhsuldar ötürmə verib. Ronaldonun yığma komandanın heyətindəki oyun və qol sayı mütləq dünya rekordudur.
