“Başqa sənətkarları deyə bilmərəm, amma mən gənclər haqqında yalnız yaxşı sözlər danışa bilərəm. Uzun illərdir ki, gənclərə dəsr deyirəm. İstər magistrlara, istərsə də bakalavrda olan gənclərdən söhbət gedir. Mən gənclərimizə inanıram, ona görə ki, onların istedadının şahidi oluram. Tələbələrimlə birlikdə seriallarda, filmlərdə çəkilirəm. Böyük mənəvi zövq alıram” Bunu Moderator.az-a açıqlamasında xalq artisti, sevilən aktrisa Həmidə Ömərova deyib. O daha sonra əlavə edib.
“Bu günlərdə çəkildiyim, ssenarisini mənim tələbəm Failə xanımın yazdığı, rejissoru isə həyat yoldaşı Valeh Əhmədovun olan “Evdə qalmış-2” filminin təqdimatı oldu. Kollektivin 70 faizi gənclər idi. Çoxunun da debüt işi idi. Valeh Əhmədov artıq serial sistemindən çıxıb, müstəqil filmlər çəkir. Çox maraqlı da alınır. Rejissor Rüfət Şahbazovla mən uzun illərdir serial sektorunda işləyirəm. Gənc olmasına baxmayaraq 15 ildir o serial çəkir, hər dəfə də çox maraqlı ekran işləri ilə tamaşaçıların görüşünə gəlir. Onun çəkdikləri tamaşaçılar tərəfindən böyük rəğbətlə qarşılanır. Ümumiyyətlə bizdə serial sektorunda böyük canlanma var. Canlanma olanda da rəqabət olur. Rəqabət olanda da daha yaxşı işlər ortalığa çıxır. Aktyor, aktrisalarımız da çoxdur. Həm daxilən zəngindirlər, həm də xaricən ekrana çox yaraşırlar. İstər teatrlarda işləyirlər, istərsə də filmlərdə çəkilirlər. Hər sahədə istedadlı gənclərimiz var. Mən onları alqışlayıram və inanıram ki, nə qədər onlar belə məhsuldar işləsələr, işdən qorxmasalar, özlərini müxtəlif sahələrdə sınasalar bizim də mədəniyyətimizin gələcəyi olar” deyə aktrisa bildirib.
Həmidə Ömərova bildirib ki, ona çoxlu rol təklifləri olur:
“Dəvət gələndə fikirləşmirəm ki, bu filmi kim çəkir, kimlər çəkilir. Məni maraqlandıran ssenaridir, təklif edilən obrazdır. Ssenari, xüsusilə də oradakı rol mənim üçün maraqlıdırsa razılıq verirəm. Əsas rol oynamaq deyil. Əsas olan odur ki, sən o rolun vasitəsilə tamaşaçıya nə verəcəksən? Mən o rolla nəsə edə biləcəyəmmi? Bax əsas məsələ budur” deyə sənətkar bildirib.
