Bu gün 2022-2024-cü illər ərzində qanın laxtalanma pozğunluğundan əziyyət çəkən vətəndaşlara tibbi yardımın kompleks yanaşmasına dair hesabat konfransı keçirilib. QHT.az xəbər verir ki, konfransda çıxış edən Milli Məclisin Səhiyyə komitəsinin üzvü, deputat Pərvanə Vəliyeva hemofiliya xəstəliyinin mahiyyəti və onun müalicəsi istiqamətində ölkəmizdə həyata keçirilən tədbirlər haqqında məlumat verib:
“Hemofiliya - qanın laxtalanma sistemində olan VIII və (və ya) IX faktorların çatışmaması ilə xarakterizə olunan irsi qan xəstəliyidir. Təsəvvür edin ki, uşağınızın oyun meydançasında yıxılır. Əksər ailələr üçün bu adi haldır, kiçik sıyrıqlar əmələ gəlir və bir-iki günə sağalır. Lakin hemofiliyadan əziyyət çəkən ailələr üçün o an qorxu, qeyri-müəyyənlik və böyük stress deməkdir. Çünki bu yara dayanmayan qanaxmaya çevrilə bilər. Kiçik bir zədə xəstəxanaya baş çəkməyə səbəb ola bilər. İndi təsəvvür edin ki, bu qorxu keyfiyyətli tibbi xidmətə çıxışın olmaması ilə birləşir. Təsəvvür edin ki, övladınızın ehtiyac duyduğu qayğının mövcud olduğunu, lakin coğrafiya, maliyyə ilə bağlı maneələr və ya səhiyyə sisteminin düzgün qurulmaması səbəbindən əlçatmazdır. Bu, bütün dünyada bir çox hemofiliyalı xəstələr üçün təsəvvür deyil - bu, onların reallığıdır".
Deputat həmçinin bildirib ki, hemofiliya müalicə edilə bilən bir xəstəlikdir: "Tibbdəki nailiyyətlər bizə innovativ müalicə üsulları təqdim edir: əvəzedici müalicələr, faktor olmayan alternativlər və hətta gen terapiyasını. Bununla belə, həyat xilasedici bu həllər bütün dünyada milyonlarla xəstə üçün bir xəyal olaraq qalır. Niyə? Çünki səhiyyə imkanları qlobal dünyada bərabər deyil. Lakin səhiyyə - imtiyaz deyil, bu, fundamental insan hüququdur. Ölkəmizdə Hemofiliyalı xəstələrin müalicəsi ilə bağlı bir sıra mühüm tədbirlər görülməkdədir. Prezident İlham Əliyev tərəfindən hemofiliya və talassemiya irsi qan xəstəliyinə düçar olmuş şəxslərə dövlət qayğısının göstərilməsi ilə bağlı bir sıra tapşırıqlar verilib. Həmçinin, 2005-ci ildə bu sahədə Dövlət Proqramı qəbul olunub, 2006-cı ildən isə qan laxtalandırıcı faktor preparatları ölkəmizə gətirilir və pasiyentlərə dövlət hesabına təqdim edilir. Hemofiliyalı xəstələrə lazımı dozada faktor konsentratı vurulmasına baxmayaraq, bəzən qanaxma davam edir və bu hal xəstələrin inhibitor olmasına şübhə yaradır. İnhibitorlu xəstələr müalicəyə çox çətin tabe olduğundan həmin xəstələrin müalicəsi baha başa gəlir. Lakin dövlətimiz tərəfindən, dövlət proqramı çərçivəsində bu müalicənin hamı üçün əlçatan olması üçün çalışılır".
"Heydər Əliyev Fondunun təşəbbüsü ilə Milli Hematologiya və Transfuziologiya Mərkəzinin yaradılması nəticəsində bu xəstəliyin müalicəsinin müasir səviyyədə təşkili mümkün olmuşdur. Ölkəmizdə hemofiliyalı xəstələrin müalicəsi Azərbaycanın Birinci vitse-prezidenti, Heydər Əliyev Fondunun prezidenti Mehriban xanım Əliyevanın daim nəzarətində və diqqətindədir. Hemofiliya xəstəliyi multidisiplinar yanaşma tələb etdiyindən onun müalicəsi daha kompleks şəkildə aparılmalıdır. “Ölkəmizdə görülən tədbirlər nəticəsində hemofiliyalı xəstələrin normal həyat fəaliyyətinin təmin edilməsinə, bu xəstəlikdən əlillik hallarının azaldılmasına nail olunub. 3 may 2005-ci ildə Hemofiliya və talassemiya irsi qan xəstəliklərinə düçar olmuş şəxslərə dövlət qayğısı haqqında Azərbaycan Respublikasinin Qanunu qəbul edilmişdir. Bu qanun Hemofiliya və talassemiya irsi qan xəstəliklərinə düçar olmuş şəxslərə dövlət qayğısını ifadə edir".- deyə Pərvanə Vəliyeva əlavə edib.
Deputat həmçinin bildirib ki, irsi qan xəstəliyi olan şəxslərə ambulator və stasionar şəraitdə göstəriləcək tibbi yardımın beynəlxalq tələblərə uyğun şəkildə aparılması da sevindiricidir, lakin qanunvericilikdə bəzi boşluqların olması da istisna edilmir. Bununla bağlı İctimai İştirakçılıq haqqında AR qanununu əsas tutaraq İctimai birliklər tərəfindən hazırlanmış təkliflərin müzakirəyə təqdim edilməsi mümkündür: "Sizə işlərinizdə uğurlar arzu edir və konfransın işinə də uğurlar arzu edirəm”.
