.jpg)
"Kapital Bank bahalı kreditlər təklif edən bank deyil. Doğurdan da, bu, belədir. Biz davamlı olaraq bazar payımızın nə qədər dəyişməsini, digər bankların kredit şərtlərini və hansı formalarda təqdim etdiklərini izləyirik".
Marja.az xəbər verir ki, bunu "Kapital Bank" ASC-nin İdarə Heyətinin sədri, Baş İcraçı Direktoru Fərid Hüseynov mətbuat konfransında bildirib.
Onun sözlərinə görə, "Kapital Bank" kredit faizləri ilə bazarın orta göstəricisində qalmağa çalışır:
"Bizim xüsusi seqment müştərilər üçün çox aşağı faizli kreditlərimiz də var. Məsələn, təqaüdünü "Kapital Bank" vasitəsilə alan təqaüdçülərə təklif edilən krediti qeyd edə bilərəm. Həm onların kartları bizdədir, həm də bu bir sosial məsələdir. Həmçinin, müxtəlif kampaniyalar ilə daha aşağı faizli kreditlər təklif edirik. Bundan başqa, müştərinin kredit davranışlarına, risk profilinə uyğun da individual faiz dərəcəsi tətbiq edirik. Əgər müştəri əvvəlki kreditləri vaxtında qaytarıbsa, onun növbəti kreditində faiz dərəcəsi nisbətən daha aşağı olur".
"BELƏ TƏƏSSÜRATIN YARANMASININ SƏBƏBİ "KAPİTAL BANK"IN MÜŞTƏRİLƏRİNİN ÇOX OLMASIDIR"
"Kapital Bank" ASC-də İdarə Heyətinin üzvü, Baş Maliyyə İnzibatçısı Emin Məmmədov da bildirib ki, "Kapital Bank"ın kredit faizləri bazarın orta dərəcələrinin üzərində deyil, ortalarındadır:
"Bəzən hətta orta göstəricidən də daha aşağı olur. ""Kapital Bank"ın kreditləri bahalıdır" təəssüratının yaranması bankımızın müştərilərinin çox olması ilə əlaqədardır. Müəyyən müştərilər həmişə daha aşağı faizlər ilə kredit istəyirlər. Biz davamlı olaraq bazarı izləyirik, müştərilərə bazarın orta göstəricisində və daha aşağı faizlər təklif etməyə davam edirik".
Emin Məmmədov 10 aylıq maliyyə nəticələrindən bəhs edərək bildirib ki, 2024-cü ilin oktyabr ayının sonunda "Kapital Bank" ASC-nin cəmi aktivləri 10,1 milyard manat təşkil edib. Bu, 2023-cü ilin sonu ilə müqayisədə təxminən 15% çoxdur. 2023-cü ilin sonunda "Kapital Bank" ASC-nin cəmi aktivləri 8,8 milyard manata bərabər idi.
