Xəbər verdiyimiz kimi, Tovuz rayon Aşağı Quşçu kənd 1 nömrəli tam orta ümumtəhsil məktəbinin 2 sinfində pelet sobasının tıxanması tüstülünməyə səbəb olub. Hadisə nəticəsində 70-dən artıq şagird və bəzi müəllimlər tüstüdən zəhərlənib. Onlara rayon xəstəxanasında yardım edilib və hər biri evə buraxılıb.
Hadisə ilə əlaqədar Tovuz rayon prokurorluğunda araşdırma aparılır.
Bəs hadisədən sonra məktəbdə dərslər bərpa olunubmu?
AzEdu.az Modern.az-a istinadən xəbər verir ki, məsələ ilə əlaqədar sorğuya cavab olaraq Qazax-Tovuz Regional Təhsil İdarəsindən məlumat verilib ki, Tovuz rayon Aşağı Quşçu kənd 1 nömrəli tam orta məktəbdə tədris prosesi bərpa olunub.
Bildirilib ki, ötən gün sobalara baxış keçirilib, problem aradan qaldırılıb və istilik təmin olunub.
"Hazırda təhsil sektorunun nümayəndələri də məktəbdədir. Vəziyyət nəzarətdə saxlanılır", - deyə cavabda qeyd olunub.
