Masallıda partlayışda xəsarət alan şəxs Bakıdakı xəstəxanaya göndərilib.
Bu barədə APA-nın cənub bürosuna Masallı rayon mərkəzi xəstəxanasının ictimaiyyətlə əlaqələr üzrə mütəxəssisi Ceyhun Hüseynov bildirib. Onun sözlərinə görə dekabrın 22-də saat 14:15 radələrində Masallı rayonu Güllütəpə kənd sakini, 1961-ci il təvəllüdlü şəxs (kişi cinsli) aşağı ətrafın, hər iki əlin və baş-sifətin 2, 3-cü dərəcəli termik yanığı diaqnozu ilə Masallı Rayon Mərkəzi Xəstəxanasına hospitalizasiya olunub. Zəruri tibbi yardımlar göstərildikdən sonra həmin gün saat 16:00 radələrində Nərimanov Tibb Mərkəzinin nəzdindəki Yanıq Mərkəzinə təxliyə olunub.
***
22 dekabr, 19.07
Fövqəladə Hallar Nazirliyinin “112” qaynar telefon xəttinə Masallı rayonu, Güllütəpə kəndində fərdi yaşayış evində partlayış baş verməsi barədə məlumat daxil olub.
Bu barədə APA-ya Fövqəladə Hallar Nazirliyindən məlumat verilib.
Məlumatla əlaqədar dərhal əraziyə FHN-in Dövlət Yanğından Mühafizə Xidmətinin Masallı rayon Yanğından Mühafizə Hissəsinin qüvvələri cəlb olunub.
Hadisə yerində əməliyyat şəraitinin qiymətləndirilməsi zamanı ümumi sahəsi 324kv.m. olan ikimərtəbəli fərdi yaşayış evində, ilkin ehtimala görə, qaz sızması nəticəsində yanğınla müşayiət olunmayan partlayışın baş verdiyi müəyyən olunub.
Partlayış dalğasının təsirindən evə ziyan dəyib, 1 nəfər xəsarət alıb.
FHN-in qüvvələri tərəfindən hadisə yerində müvafiq təhlükəsizlik tədbirləri görülüb.
Hadisə ilə əlaqədar aidiyyəti qurumlar tərəfindən araşdırma aparılır.
