İspaniya La Liqasının 18-ci turunun “Real”la səfər oyunu (2:4) “Sevilya”nın yarımmüdafiəçisi Xesus Navas üçün əlamətdar olub.
Arena.az məlumat verir ki, bu, Navasın peşəkar futbolçu karyerasında sonuncu oyunu olub.
Oyundan sonra Navas “Real”a və “qaymaqlılar”ın azarkeşlərinə müraciət ünvanlayıb:
“Bu gün “Santyaqo Bernabeu”da yaşadığım məqam mübarək dəlilik idi. Rəqibin stadionunda belə bir məqamı gördüyümü xatırlamıram.
Buna görə də mən, “Real” azarkeşlərinə göstərdikləri fədakarlıq və mənə unudulmaz xatirələr bəxş etdikləri üçün təşəkkür etmək ehtiyacını hiss edirəm.
Verdikləri şərəfləndirmədə iştirak etdikləri üçün klubun futbolçularına və məşqçilər heyətinə də təşəkkür edirəm. Mən bu tədbirin təşkilində iştirak etmiş bütün “Real” işçilərinə təşəkkürümü bildirirəm”, – “Diario AS” dərgisi Navasdan sitat gətirir.
Xatırladaq ki, Xesus Navas dekabrın 14-də İspaniya La Liqasının 17-ci turunda “Selta” ilə son ev oyununa (1:0) çıxmışdı.
“Navas futbolda nümunə idi”
“Real”ın baş məşqçisi, italyan mütəxəssis Karlo Ançelotti Xesus Navas haqda hörmətlə danışıb:
“Navasın vida oyunu? Xesus karyerası, uğurları və hər şeydən əvvəl davranışı ilə buna layiq idi. O, futbolda nümunə idi, hamı belə ruhlu, müvafiq xasiyyətli futbolçularının olmasını istərdi – Navas bütün bunları təcəssüm etdirir”, deyə Ançelotti vurğulayıb.
Xesus Navas “Sevilya”nın yetirməsidir və 2001-ci ildə karyerasını başladığı klubda 2013-cü ilin iyuluna qədər çıxış edib. Bu müddət Navasın “Sevilya”dakı birinci dövrü kimi əlamətdardır. Ardınca Navas 20 milyon avro məbləğ müqabilində “Mançester Siti”yə keçib. 2017-ci ilin avqustunda isə dörd illik ayrılıqdan sonra Navas “Sevilya”ya qayıdıb.
Navasın “Sevilya”da çıxışının ümumi mənzəsəsi 704 oyun, 39 qol, 119 məhsuldar ötürmədən ibarətdir.
Xesus Navas 2009-cu ilin noyabrında debüt etdiyi İspaniya yığmasının heyətində 56 oyun keçirib, 5 qol vurub və 11 məhsuldar ötürmə verib.
Xesus Navasın zəngin qənimətlər muzeyi var. Vurğulayaq ki, Navas “Sevilya”nın ən çox qənimət qazanmış futbolçusudur. Bu qənimətlərə “Sevilya” ilə 2 İspaniya Kral Kuboku, İspaniya Super Kuboku, 2 Avropa Liqası və həmçinin 2 UEFA Kuboku, UEFA Super Kuboku daxildir. Həmçinin Navas “Mançester Siti” ilə İngiltərə Premyer Liqasının və 2 dəfə İngiltərə Liqa Kubokunun qalibi olub.
Navas İspaniya yığması ilə 2010-cu il dünya çempionatında və 2012-ci il Avropa çempionatında, eləcə də 2023-cü il UEFA Millətlər Liqasında qalibiyyət qazanıb.
Fərdi mükafatlara gəlincə, Navas 2022/2023-cü illər mövsümündə “Sevilya”da ilin oyunçusu seçilib.
Sonda onu da xatırladaq ki, bir neçə ay öncə Xesus Navas “Sevilya”ya münasibətdə comərd addımı ilə diqqət mərkəzinə düşmüşdü. Ötən mövsümün sonunda müqaviləsinin bitməsilə klubdan ayrılacağını açıqlamış kapitan Navas, “Sevilya” ilə ödənişsiz əsasda cari təqvim ilinin sonuna qədər müddətə yarımillik müqavilə imzalamışdı. Navas yeni əmək müqaviləsi üzrə bütün maaşını “Sevilya”nın xeyriyyə fonduna köçürəcək. 2025-ci ildə isə, futbolçu karyerasını başa vurmuş 39 yaşlı Xesus Navas, komanda strukturunda “ömürlük” müqavilə ilə işə başlayacaq.
