Cəmiyyəti sağaltmaq vəzifəsi jurnalistin üzərinə düşür, çünki o, cəmiyyətin bir növ həkimidir.
“Report” xəbər verir ki, bu barədə “Şərq” qəzetinin baş redaktoru, jurnalist Akif Aşırlı Report Media Məktəbinin tələbələri ilə görüşündə deyib.
Onun sözlərinə görə, “Şərq” qəzetində 180-ə yaxın jurnalist yetişib:
"Qəzet olaraq müəyyən prinsiplərimiz var. İlk olaraq jurnalistin dünyagörüşü yerində olmalıdır. Bəzən ölkənin ictimai-siyasi durumundan xəbəri olmayan xeyli gənc jurnalistlə qarşılaşırıq, sanki adada yaşayırlar. Jurnalistin əlində qeyd dəftəri olaraq gündəmi izləməli, ən mühüm xəbərləri, maraqlı fikirlərini qeyd etməli olduğunu düşünürəm. Bunu köhnəlik kimi yox, peşəkarlıq olaraq qəbul etmək lazımdır. Media müxtəliflik üzərində qurulur. Jurnalist də mətnə fərqli baxış gətirməlidir. Cəmiyyətə fərqli fikirlər təqdim edilməli, fərqli aspektlərdən yanaşma olmalıdır” -, o bildirib.
A.Aşırlı yeni dövr mətbuatındakı dəyişikliklərə də toxunub:
“Jurnalistikada əsaslı dəyişiklik mətnin səs və görüntü ilə əvəz olunmasıdır. Ancaq unutmayaq ki, jurnalistikanın əsası qəzetçilikdir. İndiki dövrdə hamı tələsir deyə əsaslı yazılara zaman sərf edərək oxuyan insanların sayı azalıb".
Akif Aşırlı 1969-cu ildə Qazax rayonunun Daş Salahlı kəndində anadan olub. 1998-ci ildə Bakı Dövlət Universitetinin tarix fakültəsini bitirib. Jurnalistlik fəaliyyətinə "7 gün" qəzetində başlayıb. 1996-cı ildə "Şərq" qəzetini təsis edib. Həmin vaxtdan etibarən "Şərq"in baş redaktorudur. Azərbaycan Respublikasının Əməkdar jurnalisti, tarix üzrə fəlsəfə doktorudur. 2005-ci ildə jurnalistikanın inkişafında xidmətlərinə görə Azərbaycan Respublikası Prezidentinin sərəncamı ilə "Tərəqqi" medalı ilə mükafatlandırılıb.
"Ağlama, Damcılı bulağı", "Türkün Xocalı soyqırımı", "Nəriman Nərimanovun Kremldə qətli", "Cümhuriyyət mətbuatında Qafqaz İslam Ordusu", iki cilddə "Azərbaycan mətbuatı tarixi" kitablarının müəllifi, "Bağanıs Ayrım soyqırımı" kitabının həmmüəllifidir. 2022-ci ildə “Mətbuat tarixi: sənədlər, faktlar” kitabı işıq üzü görüb.
