2024-cü ilin yanvar-mart ayları ərzində Azərbaycanda 22 517 yeni iş yeri açılıb ki, bu da ötən ilin eyni dövrü ilə müqayisədə 25,9 faiz artım deməkdir. Dövlət Statistika Komitəsinin məlumatlarına görə, eyni zamanda, birinci rüb ərzində ölkədə 21 781 fərdi sahibkarlıq subyekti yaradılıb.
İlin ilk üç ayında ölkə ərazisində 2 955 yeni müəssisə və təşkilat açılıb. Yaradılmış müəssisələrin 94,1 faizi özəl sektora, 5,4 faizi isə dövlət sektoruna aid olub.
Hüquqi şəxslər tərəfindən yaradılan iş yerlərinin sahələr üzrə bölgüsü belədir: 25,4 faizi tikinti, 21 faizi ticarət və nəqliyyat vasitələrinin təmiri, 8,7 faizi nəqliyyat və anbar təsərrüfatı, 7,2 faizi peşə, elmi və texniki fəaliyyət, 6,7 faizi emal sənayesi, 5,8 faizi turistlərin yerləşdirilməsi və ictimai iaşə, 2,3 faizi informasiya və rabitə, 22,9 faizi isə digər iqtisadi fəaliyyət növləri.
Yeni yaradılmış iş yerlərinin 79,9 faizi Bakıda, 20,1 faizi isə regionlarda yerləşir.
