Bakı, 21 iyun, AZƏRTAC
İyunun 23-də Səhiyyə Nazirliyi və Akademik Zərifə Əliyeva adına Milli Oftalmologiya Mərkəzinin birgə təşəbbüsü ilə avtomobil səyyar klinikası Mingəçevir şəhər sakinləri üçün Su elektrik stansiyasının həyətində tibbi aksiya keçirəcək.
Mərkəzin elmi-məlumat, tədris və təşkilati-metodik bölməsindən AZƏRTAC-a bildirilib ki, saat 09:00-da başlayacaq aksiyada məqsəd operativ şəkildə pasiyentləri yerində müayinə edərək göz xəstəlikləri ilə bağlı ümumi nəticəyə gəlmək, nəticəyə əsasən müşahidə olunmuş xəstəliyə müalicə metodu tətbiq etmək, ciddi durumla qarşılaşdıqda pasiyentləri mərkəz və ya yaxın ərazidə yerləşən filiallara yönləndirməkdir.
Mərkəzin birgə təşəbbüsü ilə Akademik Zərifə Əliyeva adına Milli Oftalmologiya Mərkəzi tərəfindən 2005-ci ildə respublika rayonlarının əhalisinə müayinə və müalicə məqsədli yardım üçün xüsusi müasir diaqnostik avadanlıqla təchiz olunmuş oftalmoloji yardım avtomobil səyyar klinikası təşkil olunub. Əsas məqsəd sakinlərin yaşadıqları yerdə müayinə, müalicə olunmasına şərait yaratmaq, əldə edilən nəticələrə əsasən uyğun tədbirlər görməkdir. Mərkəzin həyata keçirdiyi tədbirlər hər il artır və bu dövlətimizin başçısının səhiyyə ilə bağlı reallaşdırdığı layihələrin əsas tərkib hissələrindən biri hesab olunur. Akademik Zərifə Əliyeva adına Milli Oftalmologiya Mərkəzinin bütün filialları ən son texnoloji avadanlıqlarla təchiz edilib. Klinikada təcrübəli və xaricdə ixtisas keçmiş həkim-oftalmoloqlar bütün göz xəstəliklərinin müayinə və müalicəsi, eləcə də əməliyyatı ilə məşğul olur. Bununla yanaşı, 2018-ci ildən Akademik Zərifə Əliyeva adına Milli Oftalmologiya Mərkəzinin Səyyar Qatarı fəaliyyətə başlayıb.
