Ümumi Cərrahiyyə Mütəxəssisi Dos. Dr. Turan Acar, getdikcə daha çox istifadə edilən robot cərrahiyyə üsulunun kolon və düz bağırsaq xərçəngi əməliyyatlarında sürətli sağalma və daha az ağrı baxımından rahatlıq təmin etdiyini bildirib. Robot cərrahiyyənin xüsusilə düz bağırsağın şişlərində dar boşluqlarda işləmə imkanı verdiyini ifadə edən Dos. Dr. Acar, bu yolla bəzi xəstələrin qalıcı kolostomadan (torba) xilas ola biləcəyinə diqqət çəkib.
Turkustan.az xəbər verir ki, dünyada pandemiyadan sonra tezliyi ikinci yerə yüksələn kolon və düz bağırsaq xərçənglərinin müalicəsində xəstələrin sağ qalması və xərçəngin təkrarlanmasının qarşısının alınması baxımından onkoloji cərrahiyyəyə uyğun cərrahiyyə əməliyyatının aparılması vacibdir.
Ümumi Cərrahiyyə Mütəxəssisi Dos. Dr.Turan Acar qeyd edib ki, robot cərrahiyyə əməliyyat edilən bölgənin üçölçülü ətraflı qiymətləndirilməsində, xüsusilə düz bağırsaq kimi dar bir sahədə yerləşən şişlərdə, əsas damarların və sinirlərin qorunmasında, ən kiçik limfanın belə təmizlənməsində böyük rahatlıq təmin edir.
Robot cərrahiyyənin cərraha və xəstəyə verdiyi rahatlıq səbəbiylə getdikcə adi hala çevrildiyini ifadə edən Dos. Dr. Acar, “Robotik qolun qarın boşluğunda qeyri-məhdud hərəkət qabiliyyəti və millimetrik hərəkətlərə qarşı yüksək həssaslığı ilə açıq əməliyyatda çatılması çətin olan bölgələrə asanlıqla çatmaq olar. Bu şəkildə həyata keçirilən cərrahi əməliyyatdan ən yüksək səmərəlilik əldə edilir. Xəstənin qarnında böyük yaralar yaratmadan 8 millimetrlik 4 kiçik deşiklə bütün xəstə toxumaları təmizləmək olar. “Əməliyyatdan sonra sağalma və normal həyata qayıtmaq daha tez və asan olur.
Robot üsulla xəstənin daha qısa müddətdə sağaldığını da qeyd edən Dos. Dr. Acar dedi:
"Uyğun xəstələrdə robot üsulu daha az ağrı, daha kiçik yara sahəsi və daha qısa xəstəxanada qalma kimi üstünlüklərə malikdir. Bu üstünlüklər sayəsində xəstələr gündəlik həyatlarına daha tez qayıdırlar.
Uyğun xəstə dedikdə nəyi nəzərdə tuturuq; Kolorektal xərçəng diaqnozu qoyulduqdan sonra ilk növbədə xəstənin təcili cərrahi müdaxilə tələb edən həyati təhlükəsi olub-olmadığını qiymətləndirmək lazımdır. Bu vəziyyətlərə bağırsağın şiş tərəfindən tamamilə bağlanması, bağırsaq perforasiyasına səbəb olan şiş və nəzarətsiz şiş qanaxması daxildir. Əgər belə deyilsə, ən vacib addım xəstəliyin mərhələsidir. Çünki hər mərhələnin fərqli müalicə strategiyası var.
Cərrahi müalicə üçün namizəd olan xəstələr diqqətlə seçilir və buna uyğun olaraq planlaşdırılır. Kolorektal xərçənglər yalnız yoğun bağırsaqdakı şişlərlə məhdudlaşmır. Xəstəlik şişin ətrafındakı damarlar və limfa kanalları vasitəsilə yayılır. Ona görə də əməliyyat zamanı xəstəliyin yerləşdiyi bağırsaq və ətrafdakı limfa düyünləri də təmizlənir”.
Eltac Zülfüqaroğlu/Turkustan.az
