"Oyundan-oyuna nələrisə daha yaxşı edirik. Amma yenə də konsentrasiyadan düşürük. İlk hissədə daha yaxşı mübarizə apardıq. Hər iki hissədə bağışlanmayacaq səhvlər etdik. "Zirə"ni təbrik edirəm. Hər bir oyunun özünün istəyi, tapşırığı var. Futbolçuları da get-gedə tanıyırıq. Məşqçilər korpusu olaraq, meydana sonradan daha yaxşı yerli oyunçular girə biləcək. Ona görə belə qərar verdik".
QOL.az xəbər verir ki, bu sözləri “Kəpəz”in baş məşqçisi Azər Bağırov Misli Premyer Liqasının 8-ci turunda “Zirə”yə 0:3 hesablı məğlub olduqları oyundan sonra mətbuat konfransında deyib.
O, komandanın bu vəziyyətindən çıxması üçün plan cızdıqlarını bildirib: "Bu gün Paçunun gəlməsi, Pananın bizə qoşulmasını görürük. Oyun planında da, bəzi dəyişikliklər var. Onları rotasiya edib yoxlayırıq. Düşünürəm ki, əsasən də müdafiədə daha çox dəqiq olmalıdır. Mən gələndən üç oyun keçirmişik. "Araz-Naxçıvan"la qola qədər pis mübarizə aparmadıq. "Zirə" ilə görüşdə də qola qədər pis deyildik. Futbolçular bəzi məsələləri anlayırlar ki, nə etmək lazımdır. Bunu 90 dəqiqəlik çərçivəyə salmaq lazımdır".
Mütəxəssis trasnferlər haqda da söz açıb: "Qışa qədər transferlərimiz tamamlanıb. Amma hər şeyi zaman göstərəcək. Bir oyunçu da dünən bizə qoşuldu".
