"Pekin öz maraqlarına və nüfuzuna xələl gətirmədən Avropada müasir tarixin ən böyük münaqişəsini alovlandırmağa davam edə bilməz".
HİT.az xəbər verir ki, bunu NATO-nun baş katibi Mark Rütte bu gün Brüsseldə alyansın rəhbəri kimi ilk mətbuat konfransında deyib.
“Çinin Rusiya hərbi sənayesinə dəstəyi Rusiyaya Ukraynada müharibə aparmağa imkan verən həlledici amilə çevrilib. Çin öz maraqlarına və reputasiyasına xələl gətirmədən II Dünya müharibəsinin bitməsindən bəri Avropada bu ən böyük münaqişəni alovlandırmağa davam edə bilməz”, deyə Rütte bildirib.
O xatırladıb ki, Rusiya Şimali Koreya və İrandan da hərbi dəstək alır və bu, bizi təhlükəsizlik məsələlərinə qlobal ölçüdə baxmağa məcbur edir.
“NATO-nun diqqəti Avro-Atlantik təhlükəsizliyə yönəlməlidir ki, əhalimiz təhlükəsiz olsun. Lakin bugünkü təhdidlər getdikcə qlobal xarakter alır. Ona görə də mən yaxın, uzaq və yaxın, bizim dəyərlərimizi bölüşən ölkələrlə tərəfdaşlığı dərinləşdirəcəyəm”, deyə Alyansın yeni rəhbəri bildirib.
O, Ukraynaya birgə dəstəkdən tutmuş hibrid təhlükələrə qarşı mübarizəyə qədər bir çox sahələrdə əməkdaşlıq potensialını reallaşdırmağa imkan verən NATO-nun Avropa İttifaqı ilə tərəfdaşlığının rolunu xüsusilə qeyd edib.
Rüttenin sözlərinə görə, o, həmçinin Alyansın cənub qonşuluğunda sabitliyi dəstəkləmək üçün NATO müttəfiqlərinin Yaxın Şərq, Şimali Afrika və Sahel regionu ölkələri ilə tərəfdaşlığının genişləndirilməsini təşviq etmək niyyətindədir. Belə tərəfdaşlıq həm də Avropa dövlətləri və onların əhalisi üçün təhlükə olmaqda davam edən terrorizmlə mübarizədə daha çox iş görməyə imkan verəcək.
“Bu ayın sonunda Avstraliya, Yeni Zelandiya və Yaponiya ilk dəfə NATO-nun müdafiə nazirlərinin iclasında iştirak edəcək. Mən onları salamlamağı və qarşılaşdığımız ümumi problemlərin həlli üçün ümumi yanaşmaları müzakirə etməyi səbirsizliklə gözləyirəm”, deyə Mark Rütte əlavə edib.
Samir
