Rusiyada əhalinin yoxsulluq həddinə münasibəti ilə bağlı aparılan sorğu təəccüblü nəticələr ortaya çıxarıb.
Hafta.az-ın yazdığına görə, “Superjob” şirkətinin apardığı araşdırmada bildirilir ki, Rusiyada bir adam kasıb sayılmaması üçün ayda ən azı 43 min rubl (441 dollar) qazanmalıdır. Sorğunu bildirən RBC qəzeti bu məbləğin Moskva və Sankt-Peterburqda 45 min rubla qədər artdığını yazır.
Sorğuda iştirak edən 1600 iqtisadi fəal iştirakçı xoşbəxt olmaq üçün lazım olan aylıq gəlirin miqdarını da qiymətləndirib. Moskvada kişilər xoşbəxtliyi ayda 270 min rubl, qadınlar isə 230 min rubl qazanmaqla əlaqələndirərkən, Sankt-Peterburqda bu məbləğ 240 min rubl olaraq müəyyən edilib.
Rusiyada insanların orta xoşbəxtlik həddi 250 min rubl (2540 dollar) olaraq hesablanıb. Digər tərəfdən, bir insanın "zəngin" sayılması üçün tələb olunan aylıq gəliri ruslar 860 min rubl (8,8 min dollar) olaraq ifadə edirlər. Moskvada bu rəqəm 890 min rubla qədər çıxa bilər.
Nəhayət, “Rosstat”ın məlumatlarına görə, 2023-cü ildə Rusiyada yoxsulluq səviyyəsi tarixi minimuma çatıb. Ölkədə təqribən 13,5 milyon insan, yəni əhalinin 9,3 faizi yoxsulluq həddində yaşayır.
