“Real”ın keçmiş yarımmüdafiəçisi, futbolçu karyerasını bitirmiş Toni Kroos 2014-cü ildə “qaymaqlılar”a necə qoşulmasını xatırlayıb.
Arena.az xəbər verir ki, veteran oyunçu “sirrin” o vaxt da “Real”ı çalışdıran italyan mütəxəssis Karlo Ançelotti ilə telefon söhbətində “gizləndiyini” bildirib:
“Yadımdadır, Karlo Ançelotti mənə ilk dəfə 2014-cü il dünya çempionatı zamanı zəng etmişdi. O, mənə dedi: “İstəyirəm ki, sən burada, Madriddə olasan”. Mən də cavabladım: “Mən də! Amma Siz indicə Çempionlar Liqasını qazanmısınız, mən Sizin nəyinizə gərəyəm ki?” O, davam etdi: “Yox, yox, səni burada istəyirəm, sən komandamı daha da gücləndirəcəksən”. Bu, mənə daha da yaxşı olmaq üçün bir inam bəxş etdi”, deyə Kroos xatırlayıb.
Xatırladaq ki, Kroos vətəni Almaniyada keçirilən 2024-cü il Avropa çempionatından sonra peşəkar futbolçu karyerasını başa vuracağını açıqlamışdı. Buna qədər isə alman yarımmüdafiəçi “Real”la 2023/2024-cü il Çempionalar Liqasının qalibi olduğu, Dortmund “Borussiya”sı ilə möhtəşəm final oyunundan (2:0) sonra vidalaşmışdı.
2020-ci il Avropa çempionatından dərhal sonra bundestimi tərk etmiş Kross, AÇ-2024-də yığmaya köməyini təklif etmiş və yenidən bundestimin düşərgəsinə qayıtmışdı.
Toni Kroos Rostok “Hanza”sının yetirməsidir. Yarımmüdafiəçi əvvəllər “Bayer” və “Bayern”də çıxış edib və artıq, 2014-cü ilin iyulunda 25 milyon avro müqabilində “Bayern”dən keçdiyi “Real”da çıxışını başa vurduğunu elan edib.
2023/2024-cü illər mövsümündə Kroos “qaymaqlılar”ın heyətində 48 oyuna 1 qol vurub, 10 məhsuldar ötürmə ilə fərqlənib. Toninin İspaniya nəhənginin heyətində ümumi statistikası da sanballıdır: 465 oyun, 28 qol, 99 məhsuldar ötürmə.
Toni Kroos “Real”la bütün mümkün ali klub yarışlarında dəfələrlə qalib olub. Onun xəzinəsində “qaymaqlılar”la 4 İspaniya çempionluğu, 1 İspaniya Kral Kuboku, 4 İspaniya Super Kuboku, 5 UEFA Çempionlar Liqası, 4 UEFA Super Kuboku, 5 FIFA Klub Dünya Kuboku var.
Kroos 2010-cu ilin martında debüt etdiyi Almaniya yığmasının heyətində 114 oyuna 17 qol vurub, 21 məhsuldar ötürmə verib. Toni bundestimlə DÇ-2010-da və AÇ-2012-də bürünc medal qazanıb, DÇ-2014-də isə mundialın qalibi olub.
Bir müddət əvvəl, Kroosun futbol məşqçiliyi kurslarına yazıdığı barədə məlumat yayılmışdı.
