“Real” rəhbərliyi iki nüfuzlu futbol qurumuna qarşı kəskin reaksiyası ilə diqqət mərkəzində qalmaqdadı. İspaniya klubu “Qızıl top” mükafatının təşkilatçıları ilə əlaqəni kəsib.
Bu barədə “Marca” qəzeti məlumat yayıb. Xəbərdə Madrid klubunun mükafatın təsisçisi “France Football” jurnalı ilə əlaqəni dayandırdığı və bundan sonra UEFA ilə oyunların təşkilindən başqa heç bir məsələlərdə əməkdaşlıq etməyəcəyi bildirilir. Buna səbəb İspaniya klubunun futbolçusu Vinisius Juniorun mükafatı qazana bilməməsidi. Bilindiyi kimi, braziliyalı vinger uzun müddət mükafata əsas namizəd kimi göstərilmişdi. Lakin 2024-cü ilin “Qızıl top” mükafatı üçün jurnalistlər arasında keçirilən sorğuda “Mançester Siti”nin ispaniyalı yarımmüdafiəçisi Rodri qalib gəlib. Maraqlıdı ki, “Marca” artıq “Real”da Vinisiusun “Qızıl top”u heç vaxt qazanmayacağı ilə bağlı düşüncə formalaşıb. Futbolçu özü isə mükafat üçün daha nə etməli olduğunu bilmir. Xatırladaq ki, “Real” yekun seçimin ədalətli olmadığını iddia edərək Parisdəki Şatle Teatrında oktyabrın 28-də təşkil edilən mərasimi boykot etmişdi.
Yeri gəlmişkən, “Real”da Vinisiusa görə böyük narahatlıq hökm sürür. Rəhbərlik onunla yeni müqavilə bağlamağı planlaşdırır. “Marca”nın bir neçə gün əvvəl yaydığı xəbərə görə, yaxın günlərdə braziliyalı hücumçunun meneceri ilə danışıqlar başlayacaq. Madrid klubunun 2027-ci ilin yayına qədər müqaviləsi olan Vinisiusu klubda daha çox saxlamaq istədiyi məlumdu. Lakin son xəbərlərə görə, braziliyalı futbolçu yeni təklifi qəbul etmək fikrindən uzaqdı. Vinisiusun İspaniyada daim irqçi təhqirə məruz qalmasına görə bu ölkəni tərk etmək istədiyi söylənilir.
Qeyd edək ki, 24 yaşlı futbolçunun hazırkı müqaviləsində 1 milyard avro məbləğində sərbəst buraxılma maddəsi var. Onun Səudiyyə Ərəbistanı klublarının hədəfində olduğu çoxdan məlum idi. Son xəbərlərdə “Çelsi”, “Mançester Yunayted” və PSJ-nin Vinisius ətrafında cərəyan edən hadisələri pusquda dayanan şir kimi diqqətlə izlədikləri və hər an lazımi addımlar ata biləcəkləri vurğulanır.
- Gecə Modu
- Ana səhifə
- Statistika
- Mənbələr
- Reytinq
- Hava
- Valyuta
