Donald Trampın həyat yoldaşı Melaniya Tramp, qızı İvanka Tramp və kürəkəni Cared Kuşner Ağ Evə köçməyəcək.
"Cebheinfo.az" “People” jurnalına istinadən xəbər verir ki, Tramp ailəsinə yaxın olan adı açıqlanmayan mənbələr Trampın həyat yoldaşı Melaniyanın Ağ Evə köçmək istəmədiyini iddia edib.
Mənbələr Melaniya Trampın Nyu-Yorkdakı evində və ya Floridadakı Mar-a-Laqo malikanəsində yaşayacağını qeyd edərək, Melaniya Trampın “siyasətdən nifrət etdiyi üçün uzaq qalacağını”, lakin Ağ Evdəki iştirak etməsi lazım olan proqramlara qatılacağını bildirib.
“PageSix” saytının məlumatına görə, adı açıqlanmayan mənbələr Trampın qızı İvanka Tramp və kürəkəni Cared Kuşnerin də Ağ Evə köçməyəcəyini iddia edib.
Mənbələr İvanka Tramp və Cared Kuşnerin Mayamidə yaşadıqlarını və siyasətə qayıtmağı planlaşdırmadıqlarını bildirsələr də, Kuşnerin “lazım gələrsə” seçilmiş prezident Trampın yeni administrasiyasına keçid komandasına məsləhət verə biləcəyini bildiriblər.
İvanka Tramp və əri Cared Kuşner Donald Trampın 2016-cı il seçki kampaniyasını dəstəkləyib və o Ağ Evdə olarkən baş məsləhətçi vəzifəsində çalışıblar.
