Olaylar.az xəbər verir ki, bu barədə BMT-nin İqlim Dəyişmələri üzrə Çərçivə Konvensiyasının icraçı katibi Saymon Stil Bakıda BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29) açılışında bildirib.
"Məhz burada, Bakıda, Paris Sazişinin 6-cı maddəsinə dair razılaşmanı tamamlamaqla beynəlxalq karbon bazarlarının fəaliyyətinə başlamalıyıq", - S.Stil vurğulayıb
O, həmçinin, Dubayda COP28 çərçivəsində götürülən öhdəliklərə əsaslanaraq, iqlim dəyişikliklərinin qarşısının alınması üçün səylərin davam etdirilməsinin vacibliyini qeyd edib.
"Biz Dubayda razılaşdırılmış hədəflərin həyata keçməsi üçün iqlim dəyişmələrinin qarşısının alınması yolunda irəliləməliyik", - o bildirib.
S.Stil əlavə edib ki, dünya ictimaiyyəti qlobal istiləşməni 1,5°C ilə məhdudlaşdırmaq hədəfinin əlçatmaz olmasına imkan verməməlidir:
"Hətta temperatur yüksəlsə belə, razılaşmalarımıza əməl edilməlidir".
O, həmçinin, bildirib ki, 2024-cü ildə təmiz enerji və ekoloji infrastruktur sahəsinə yatırılacaq investisiyaların həcmi 2 trilyon dollara çatacaq ki, bu da qalıq yanacaqlara yatırımlardan təxminən 2 dəfə çoxdur.
"Təmiz enerji keçidi və iqlim dəyişmələrinə uyğunlaşma prosesi dayandırılmayacaq. Bizim məqsədimiz bu prosesi sürətləndirmək və onun geniş faydalarını bütün ölkələr və xalqlara çatdırmaqdır", - o deyib.
Qeyd edək ki, bu gün Bakıda COP29 konfransı rəsmi olaraq başlayıb. 11-22 noyabr tarixlərində davam edəcək bu tədbir dünya liderlərini, siyasətçiləri və iqlim üzrə ekspertləri iqlim dəyişmələri ilə bağlı təcili problemləri müzakirə etmək üçün bir araya gətirir. Gündəlikdə iqlim maliyyələşdirilməsi, emissiyaların azaldılması hədəfləri və qlobal əməkdaşlıq məsələləri dayanır. COP29-un nəticələri planetin gələcək iqlim strategiyasının formalaşmasına mühüm təsir göstərəcək.
