Futbol üzrə Niderland milli komandasının və “Ayaks”ın keçmiş futbolçusu Rayan Babel oyunçu karyerasını başa vurub.
Arena.az xəbər verir ki, təcrübəli futbolçu 37 yaşında peşəkar karyerasını sonlandırdığını sosial şəbəkə hesabında açıqlayıb.
Qeyd edək ki, Babel 2023-cü ilin sentyabr ayında Türkiyənin “Eyüpspor” klubundan ayrılandan bəri işsiz idi. Amma o, karyerasını bitirmək haqqında qərarını düz bir il sonra açıqlayıb.
Rayan Babel peşəkar karyerasına “Ayaks”da başlayıb. Daha sonra o, “Liverpul”, “Hoffenhaym”, “Kasımpaşa”, “Əl-Əyn”, “Deportivo”, “Beşiktaş”, “Fulhem”, “Qalatasaray”, “Eyüpspor” kimi klublarda çıxış edib.
Babelin oynadığı klubların heyətindəki ümumi statistikası belədir:
“Liverpul” – 146 oyun, 22 qol, 18 assist
“Ayaks” – 142 oyun, 30 qol, 20 assist
“Qalatasaray” – 100 oyun, 17 qol, 8 assist
“Beşiktaş” – 89 oyun, 29 qol, 12 assist
“Kasımpaşa” – 59 oyun, 14 qol, 12 assist
“Hoffenhaym” – 51 oyun, 6 qol, 4 assist
“Eyüpspor” – 29 oyun, 5 qol, 1 assist
“Fulhem” – 16 oyun, 5 qol, 1 assist
“Deportivo” – 12 oyun, 5 qol, 1 assist
“Əl-Əyn” – 8 oyun, 1 qol, 2 assist
Babelin əsas uğurları “Ayaks”ın adı ilə bağlıdır. O, Amsterdam klubu ilə 2 dəfə Niderland çempionu olub, 2 dəfə ölkə kubokunu, 3 dəfə ölkə super kubokunu qazanıb. Rayan “Beşiktaş”la Türkiyə çempionu, “Qalatasaray”la Türkiyə Super Kubokunun qalibi olub. O, “Eyüpspor”un heyətində də Türkiyə Birinci Liqasının çempionluğunu bayram edib.
Rayan Babel Niderland millisinin heyətində 2010-cu ildə dünya çempionatının və 2019-cu ildə UEFA Millətlər Liqasının gümüş mükafatçısı olub. O, 2005-ci ilin mart ayında debüt etdiyi milli komandanın heyətində 69 oyuna 10 qol vurub, 9 məhsuldar ötürmə verib. Babel Niderlandın U-21 yığması ilə də Avropa çempionu olub.
