Çeçenistan Respublikasında 11 məktəb direktorunun vəzifəsindən azad edildiyi açıqlanıb. Bu qərar planlaşdırılmamış attestasiyadan sonra verilib. Məlumatı Çeçenistanın rəhbəri Ramzan Kadırov öz Telegram kanalında paylaşıb.
Kadırovun sözlərinə görə, bu addım bir sıra aşkar edilən nöqsanlar səbəbindən atılıb. Həmçinin, yoxlamanı keçməyən dörd rayon təhsil şöbəsi rəhbəri də vəzifəsindən uzaqlaşdırılıb. Kadırov, təhsil müəssisələrinin rəhbərlərinin təyin edilməsinə xüsusi diqqət yetirilməsini tapşırıb.
Bundan əlavə, Ramzan Kadırov dərslərdən qaçan şagirdlərə nəzarətin gücləndirilməsini tələb edib. O, valideynlərin uşaqların dərs buraxma hallarından vaxtında xəbərdar edilməsinin vacibliyini vurğulayıb ki, onlar müvafiq tədbirlər görə bilsinlər.
Xatırladaq ki, bir müddət əvvəl Çeçenistanın keçmiş baş naziri və Rusiya hökumətində baş nazirin köməkçisi olan Muslim Xuçiyev rus məktəblərində Çarlz Darvinin təkamül nəzəriyyəsinin dərsliklərdən çıxarılmasını təklif etmişdi. Onun fikrincə, Darvinin nəzəriyyəsi yanlış olub dini inanclara ziddir və uşaqların mənəvi dəyərlərinə mənfi təsir göstərir.
Vüsal Orucov
