Dünya boksunun canlı əfsanəsi Mayk Tayson 19 ildən sonra rinqdə daha bir peşəkar döyüş keçirib. Bu dəfə onun rəqibi tanınmış yutuber Ceyk Pol olub.
Senzor.az bildirir ki, ABŞ-ın Texas ştatının Arlinqton şəhərindəki 80 min tamaşaçı tutumuna malik AT&T arenasında təşkil olunan döyüş Ceyk Polun 79:73 hesablı qələbəsi ilə yekunlaşıb.
Qeyd edək ki, peşəkar karyerası ərzində 56 döyüş keçirən Mayk Tayson 50 qələbə qazanıb. O, 44 görüşdə rəqiblərini nokautla məğlub edib. 58 yaşlı dünya çempionu 6 qarşılaşmada isə uduzub. “Dəmir Mayk” ləqəbli boksçu peşəkar karyerasını 2005-ci ildə başa vurub.
Ceyk Pol isə rinqə ilk dəfə 2018-ci ildə həvəskar döyüşlə çıxıb. İndiyədək peşəkar səviyyədə 11 döyüş keçirən yutuber 10 qələbə və 1 məğlubiyyətlə yadda qalıb. Onun YouTube platformasında 20 milyon 800 min izləyicisi var.
Onu da qeyd edək ki, Mayk Tayson bu döyüşdə rinqə çıxmasına görə karyerası boyunca ən böyük qonorarlardan birini, yəni 20 milyon dollar qazanıb. Onun 27 yaşlı rəqibi, şoumen Ceyk Pol isə 40 milyon dollar əldə edib.
