İlon Mask "OpenAI"yə qarşı hüquqi mübarizəsini genişləndirir və şirkətin işçilərə ödədiyi yüksək əmək haqqı məbləğləri ilə bağlı narazılığını dilə gətirir.
Valyuta.az "Business İnsider"a istinadən xəbər verir ki, Mask, "OpenAI"yə qarşı qaldırdığı iddiada "Microsoft" və "OpenAI"nin keçmiş idarə heyəti üzvü, həmçinin həmtəsisçi Reyd Hoffmanı da cavabdehlər sırasında göstərib. "Microsoft" 10 milyard dollarlıq sərmayə daxil olmaqla, "OpenAI"yə ümumilikdə 14 milyard dollar sərmayə yatırıb.
Mask 2015-ci ildə "OpenAI"nin həmtəsisçilərindən biri olub, lakin 2018-ci ildə idarə heyətindən ayrılıb və 2023-cü ildə öz süni intellekt şirkəti "xAI"ni yaradıb.
Maskın vəkilləri dəyişdirilmiş şikayətlərində bildirirlər ki, "OpenAI" rəqiblərini mütəxəssislərdən məhrum etmək üçün qeyri-rəqabət praktikaları həyata keçirir və yüksək maaşlarla işçiləri cəlb edir. Onların sözlərinə görə, "OpenAI" 1,500 işçiyə ümumilikdə 1,5 milyard dollar xərcləməyi planlaşdırır.
Bəs "OpenAI" işçiləri nə qədər maaş alır?
Xüsusi şirkət statusuna görə, "OpenAI" ictimaiyyətə maaş məlumatlarını açıqlamaq məcburiyyətində deyil. Buna baxmayaraq, müəyyən göstəricilər mövcuddur.
"Levels.fyi" platformasının məlumatına görə, "OpenAI"də texniki yazıçı üçün illik kompensasiya 144,275 dollardan başlayır, proqram mühəndisi üçün isə 1,338,750 dollara qədər çata bilər. Şirkətdə ümumi illik orta əmək haqqı isə 534,197 dollar təşkil edir.
Xüsusilə proqram mühəndisləri üçün bu orta göstərici 810,000 dollardır ki, bu da San-Fransisko körfəzi texnologiya sektorunun orta göstəricisi olan 257,500 dollardan əhəmiyyətli dərəcədə yüksəkdir.
"Comprehensive.io" platformasının həmtəsisçisi Rocer Li bildirib ki, "OpenAI"nin vakansiya elanlarında mühəndislik vəzifələri üçün maaş diapazonu, səhmlər və bonuslar nəzərə alınmadan, 200,000-370,000 dollar arasında dəyişir. Daha ixtisaslaşmış vəzifələrdə bu rəqəm 300,000-450,000 dollara qədər yüksəlir.
Mask, "OpenAI"ni "qeyri-kommersiya" məqsədindən uzaqlaşmaqda və "Microsoft" ilə əməkdaşlıq edərək kommersiya maraqlarını üstün tutmaqda ittiham edir. "OpenAI" isə bu iddiaları "məntiqsiz" və "əsassız" adlandırıb.
