“Bayern”in müdafiəçisi Alfonso Deyvisin agenti Nedal Huose, müştərisinin gələn yay “Real”a keçəcəyi ilə bağlı xəbərləri cavablayıb.
Arena.az xəbər verir ki, son günlərdə xarici mətbuatda Alfonsonun bu mövsümün sonunda Almaniya nəhəngini azad agent kimi tərk edəcəyi və Madrid “Real”ına keçəcəyi barədə xəbərlər dolaşmaqdadır.
Nedal Huose, müştərisi ilə bağlı iddialara belə cavab verib: “Bu, doğru deyil. Alfonsonun seçimləri çox olsa da, biz heç bir klubla razılığa gəlməmişik”.
Nedal Huose, müştərisinin Münhen klubu ilə müqaviləsinə dair sualı da cavablayıb: “Bayern”lə müqavilənin müddətinin uzadılması? Bu da seçimlərdən biridir. Bunun əksini göstərən hər hansı məlumat isə yanlışdır”, deyə Huose vurğulayıb.
Xatırladaq ki, Alfonso Deyvis futbola “Edmonton İnterneyşenls” klubunda qədəm qoyub, buradan “Edmonton Straykers”ə və ardınca isə “Vankuver Uaytkeyps”ə keçərək, böyük futbolda debüt edib. 2019-cu ilin yanvarında “Bayern” 14 milyon avro məbləğində xərc çəkərək, kanadalı futbolçunu “Vankuver Uaytkeyps”dən öz düşərgəsinə qatıb. Deyvisin “Bayern”lə müqaviləsinin müddəti 2025-ci ilin iyun ayının sonuna qədər qüvvədədir.
Cari mövsümdə Deyvis “Bayern”in heyətində 15 oyuna 3 məhsuldar ötürmə ilə fərqlənib.
Kanadalı futbolçunun Almaniya nəhənginin düşərgəsində çıxışının ümumi mənzərəsi isə 210 oyun, 11 qol və 34 məhsuldar ötürmədən ibarətdir.
Alfonso Deyvis hazırda kapitanı olduğu və 2017-ci ilin iyun ayında debüt etdiyi Kanada yığmasının heyətində 56 oyun keçirib, 15 qol vurub, 18 məhsuldar ötürmə verib.
Alfonso Deyvisin qənimətlər muzeyində “Bayern”lə qazandığı Almaniya Bundesliqası çempionluğu (5 dəfə), Almaniya Kuboku (2 dəfə), Almaniya Super Kuboku (3 dəfə), Çempionlar Liqası, UEFA Super Kuboku, FIFA Klub Dünya Kuboku var.
Fərdi qənimətlərə gəlincə, Deyvis Kanadada 4 dəfə (2018, 2020, 2021, 2022) “İlin futbolçusu” seçilib. Həmçinin Deyvis 3 qolla 2017-ci il CONCACAF Qızıl Kubokunun ən sərrast qolçusu olub.
“Transfermarkt” internet-portalı 24 yaşlı kanadalı müdafiəçinin transfer dəyərini 50 milyon avro məbləğində qiymətləndirir.
