COP29 çərçivəsində Yaponiya, Cənubi Afrika, ABŞ, İtaliya, Qazaxıstan nazirlərinin iştirakı ilə “Qlobal İqlim Şəffaflığı üzrə Nazirlərin dəyirmi masa”sı keçirilib. SİA xəbər verir ki, COP29-un Prezidenti Muxtar Babayev tədbirin təşkilində fəal iştirak etmiş Qazaxstan və İtaliya nümayəndələrinə təşəkkürünü bildirib.
O vurğulayıb ki, Azərbaycanın İkiillik Şəffaflıq Hesabatı (BTR) bu həftə təqdim olunmağa hazırdır.
“Ambisiyaların artırılması Milli Səviyyədə Müəyyən Edilmiş Töhfələr Sənədi (NDC), Milli Uyğunlaşma Planları və İkiillik Şəffaflıq Hesabatı (BTR) vasitəsilə 1,5 dərəcə hədəfini qorumaq üçün aydın planların hazırlanmasını tələb edir. İnanıram ki, qlobal iqlim şəffaflığının müxtəlif ölkələrin nazirlərinin iştirakı ilə müzakirəsi daha effektiv addımlar atmağa imkan verəcək. COP29-u bu addımları atmağa bir fürsət kimi dəyərləndirməyə çağırıram. Bu dəyirmi masada qəbul olunacaq Bakı Bəyannaməsi qlobal iqlim şəffaflığı və qlobal iqlim dəyişikliyi məsələlərində daha səmərəli addımlar atmağa təşviq edəcək”, - deyə M.Babayev əlavə edib.
Birləşmiş Millətlər Təşkilatının İqlim Dəyişikliyi üzrə Çərçivə Konvensiyasının (UNFCCC) icraçı katibinin müavini Nura Hamlaji çıxışında bildirib ki, Bakıda COP29 çərçivəsində 11 ölkə İkiillik Şəffaflıq Hesabatlarını (BTR) təqdim edib: “Bu il Paris Sazişinə əsasən Artırılmış Şəffaflıq Çərçivəsinin tam tətbiqi qeyd olunur. İlk iki ildə bir dəfə bu hesabatların təqdim edilməsində lider olmuş ölkələri qeyd edəcəyəm: Andorra, Qayana, Panama, Yaponiya, İspaniya, Türkiyə, Qazaxıstan, Almaniya, Maldiv adaları, Niderland və Sinqapur. Bu ölkələr həqiqətən də başqaları üçün güclü nümunədir”.
COP29 çərçivəsində keçirilən Nazirlər Görüşündə İkiillik Şəffaflıq Hesabatlarının (BTR) təqdimatına görə nümayəndə heyətləri mükafatlandırılıb. Mükafatlandırılan ölkələr arasında Azərbaycan, Andorra, Qayana, Panama, Yaponiya, İspaniya, Türkiyə, Qazaxıstan, Almaniya, Maldiv adaları, Niderland və Sinqapur yer alıb.
Yaponiyanın ətraf mühit naziri Keyitiro Asao vurğulayıb ki, Yaponiya Bakı Qlobal İqlim Şəffaflığı Platformasını (BTP) dəstəkləyir.
Cənubi Afrikanın ətraf mühit, meşə təsərrüfatı və balıqçılıq naziri Dion Corc qeyd edib ki, Cənubi Afrika Təkmilləşdirilmiş Şəffaflıq Sistemi (ETF) çərçivəsində fəal şəkildə çalışır və iqlim öhdəliklərinin yerinə yetirilməsini davam etdirir.
Sinqapurun davamlı inkişaf və ətraf mühit naziri Qreys Fu isə öz növbəsində bildirib ki, Sinqapur Bakı Qlobal İqlim Şəffaflığı Platformasına dəstəyini ifadə edir.
Sonra Qırğızıstanın baş nazirinin müavini Edil Baysalov çıxışında bildirib ki, ölkəsi yaxın aylarda beynəlxalq standartlara və kollektiv məqsədlərə uyğun ilk İkiillik Şəffaflıq Hesabatını təqdim edəcək.
Niderland Krallığının gənclər və idman naziri Vinsent Karremans qeyd edib ki, iqlim dəyişikliyi ilə mübarizədə, emissiyaları azaltmaqla yanaşı, səhiyyəyə də nəzər salınmalıdır.
Türkiyənin İqlim Dəyişikliyi Bürosunun rəhbəri Halil Hasar çıxışında vurğulayıb ki, Türkiyə ədalətli keçidi nəzərə alaraq, yaşıl transformasiya üçün sektoral infrastrukturun yaradılması üzərində işləyir.
Yekun nitqində Azərbaycanın xarici işlər nazirinin müavini, COP29 üzrə baş danışıqçı Yalçın Rəfiyev deyib ki, Azərbaycan İkiillik Şəffaflıq Hesabatlarının (BTR) təqdim edilməsində mühüm rol oynayır və əhəmiyyətli töhfə verir: “Bu gün bir sıra dövlətlər də ikiillik iqlim hesabatlarını təqdim edib. Həmin dövlətlərin sayı ilin sonunadək artacaq. Azərbaycanın bu məsələyə böyük rolu və töhfəsi var. Buna görə də dövlət nümayəndələri bunu xüsusi qiymətləndirdilər. Prosesi sürətləndirmək üçün biz Bakı Bəyannaməsinin imzalanmasını təklif etdik. Bu sənəd artıq qəbul olundu və dövlətlər bəyannaməyə qoşuldular. Bu sənədin mahiyyəti ondan ibarətdir ki, növbəti illərdə dövlətlər tərəfindən bu sahədə hesabatların hazırlanmasında texniki boşluqların aradan qaldırılması üçün Bakı Şəffaflıq Platforması əsasında onlar texniki dəstək, təlimlər və digər fəaliyyətlərlə təmin olunacaq. Bu, bir az vaxt və kifayət qədər resurs tələb edən prosesdir. Azərbaycanın bu təşəbbüsünü Qərb dövlətləri, donorlar da dəstəkləyir. Növbəti illərdə dövlətlərə veriləcək dəstək məhz bu donorlar, eləcə də Azərbaycan tərəfindən həyata keçiriləcək”.
Tədbirin Bakı Bəyyannaməsi qəbul olunub.
