Polşa prezidenti Anjey Duda Amerikanın Rusiya ərazisinə uzaqmənzilli silahlarla zərbə endirmək icazəsini alqışlayıb və bunun müharibədə dönüş nöqtəsi ola biləcəyini qeyd edib.
Yenicag.az xəbər verir ki, bu barədə o, RMF24 portalı ilə söhbətində bildirib.
Duda vurğulayıb ki, ABŞ-nin Rusiya ərazisinə uzaqmənzilli silahlarla zərbə endirməyə icazəsi çox mühüm hadisədir.
“Prezident Co Baydenin bu qərarını alqışlayıram. İnanıram ki, Ukraynanın rus hücumlarını geri itələmək üçün belə müdafiə vasitələri olmalıdır ki, ruslar cəbhə xəttinə o qədər də yaxın olmasın. Xüsusən də ruslar öz müttəfiqlərini döyüşlərdə iştirak etməyə dəvət etdiyi bir vəziyyətdə. Çünki bu müharibə onların tərəfindədir və ərazidə indi Şimali Koreya əsgərləri var”, – Polşa prezidenti vurğulayıb.
Onun fikrincə, bu, cəbhə xəttindəki vəziyyəti kökündən dəyişəcək:
“Rusiya aydın şəkildə görür ki, Ukrayna güclü, qətiyyətli dəstək alır və Qərbin suveren və müstəqil dövlətə qarşı təcavüzə qarşı bu qədər güclü və sərt mövqeyi tamamilə sarsılmaz və ardıcıldır”.
O, həmçinin vurğulayıb ki, Ukraynanın Rusiyanın daxilindəki hədəfləri vurmaq üçün istifadə edə biləcəyi raketlər Rusiyanın cəbhə xəttindən geri itələməyə kömək edəcək. Dudanın fikrincə, bu zərbələr çox güman ki, rusları cəbhə xəttindən və Ukrayna sərhədlərindən geri çəkilməyə məcbur edəcək və bununla da Rusiyanın hücum əməliyyatları aparmaq imkanlarını azaldacaq.
“Həqiqətən, bu, sırf müdafiə xarakteri daşıyır və Ukraynaya özünü Rusiyanın təcavüzündən daha effektiv müdafiə etməyə imkan verir”, – Duda qeyd edib.
Bundan əlavə, o qeyd edib ki, bu qərar Almaniya kansleri Olaf Şolzla Kreml rəhbəri Vladimir Putin arasında iki ildə ilk telefon danışığı kontekstində də vacib bir amildir.
Nəsimi Ələsgərli
