Özbəkistandakı Heydər Əliyev adına Azərbaycan Mədəniyyət Mərkəzi Daşkənd Dövlət Nəqliyyat Universiteti ilə birgə böyük Azərbaycan şairi Maqsud Şeyxzadəyə həsr olunmuş “Maqsud Şeyxzadənin ədəbi yaradıcılığı və müasirlik” adlı beynəlxalq elmi konfrans keçirib.
Universitetin Maqsud Şeyxzadə adına konfrans salonunda baş tutan tədbiri universitetin prorektoru Dilşad Baratov açaraq Maqsud Şeyxzadənin əsərlərinin gənc nəslin vətənpərvərlik, qəhrəmanlıq ruhunda yetişməsində böyük əhəmiyyətə malik olmasından söz açıb.
AMEA Tarix və Etnologiya İnstitutunun əməkdaşı Gülşən Kəngərli qardaş xalqlar arasındakı ədəbi-mədəni əlaqələrin möhkəmlənməsində Maqsud Şeyxzadə yaradıcılığının xüsusi rol oynadığını vurğulayıb. M.Şeyxzadə özbək xalqının qəhrəmanı Cəlaləddin Manguberdi, hökmdar Mirzə Uluğbəy kimi tarixi şəxsiyyətlərlə bağlı yaratdığı ölməz əsərlərlə özbək dramaturgiyasının əsasını qoyub. “Daşkəndnamə”, “Ağsaqqal” poemaları da oxucular tərəfindən rəğbətlə qarşılanıb. Daşkənddə yazıçının altı cildlik “Seçilmiş əsərləri” çap olunub.
Azərbaycan Mədəniyyət Mərkəzinin əməkdaşı Kərimulla Məmmədzadə, ABŞ Hofstra Universitetinin professoru Elyar Kərimov (onlayn), AMEA Ədəbiyyat İnstitutunun şöbə müdiri, professor Almaz Ülvi (onlayn), Çinin Heyibey Universitetinin dosenti Jessi Liua, Kastamonu Universitetinin əməkdaşı dosent Murad Halmet (onlayn) Özbəkistan Milli Universitetinin dosenti Aybibi İsgəndərova və başqaları ədibin həyat və yaradıcılığından söz açıblar.
Sonra Maqsud Şeyxzadəyə həsr edilən sənədli film nümayiş olunub, tələbələrin iştirakı ilə onun əsərlərindən ibarət şeir kompozisiyası nümayiş etdirilib.
Qulu KƏNGƏRLİ,
XQ-nin Türküstan üzrə xüsusi müxbiri
