Olaylar xəbər verir ki, bu barədə COP29-un prezidenti, ekologiya və təbii sərvətlər naziri Muxtar Babayev COP29 çərçivəsində keçirilən "Fermerlər üçün Baku Harmoniya iqlim təşəbbüsünün təqdimatı: İqlim dəyişikliyinə qarşı dayanıqlığın artırılması üçün fermerlərin imkanlarının genişləndirilməsi" mövzusunda tədbirdə çıxışı zamanı bildirib.
"Biz fermerlərin, xüsusilə qadınlar və gənclərin mövqeyini gücləndirməyə çalışırıq. Onlar kənd icmalarının mərkəzində yer alır. "Baku Harmoniya" iqlimə dayanıqlı kəndlərin yaradılmasına və fermerlərin iqlim dəyişikliklərinə uyğunlaşması üçün lazımi alətlərin təmin edilməsinə dəstək olacaq.
Bu təşəbbüsün təqdimat anı təsadüfi seçilməyib. Kənd təsərrüfatı həm iqlim dəyişikliklərinə töhfə verir, həm də həll yolları təqdim edir. Tullantılar və kənd təsərrüfatından yaranan metan emissiyaları artır və iqlim dəyişikliyinin təsirini ilk hiss edənlər fermerlərdir. Biz birlikdə hərəkət etməliyik ki, fermerlərimizi qoruyaq və hamı üçün ərzaq təhlükəsizliyini təmin edək", - deyə o vurğulayıb.
Qeyd edək ki, noyabrın 11-də BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29) açılışı olub.
COP29 çərçivəsində ən yüksək səviyyəli tədbir - Dünya Liderlərinin İqlim Fəaliyyəti Sammiti noyabrın 12-13-də təşkil olunub.
Noyabrın 22-dək Bakı Stadionunda keçiriləcək COP29 Azərbaycanın bu günədək təşkil etdiyi ən nəhəng tədbirdir və regionda ilk dəfə Azərbaycanda baş tutur.
COP29-dan əsas gözlənti iqlim maliyyəsi ilə bağlı ədalətli və ambisiyalı Yeni Kollektiv Kəmiyyət Hədəfinin (NCQG) razılaşdırılmasından ibarətdir.
COP29 Sədrliyi tərəfindən iqlim fəaliyyəti ilə dayanıqlı inkişaf məqsədləri arasında əlaqəni ehtiva edən, yaşıl enerji dəhlizləri, yaşıl enerji saxlancları, iqlim dayanıqlılığı üçün harmoniya, təmiz hidrogen, orqanik tullantılarda metanın azaldılması, yaşıl rəqəmsal fəaliyyət və digər mövzuları əhatə edən 14 təşəbbüs irəli sürülüb.
İqlim maliyyəsinin yaradılması fəaliyyət üçün şərait yaradan əsas prioritet olmaqla yanaşı, hamını bir araya gətirməklə 1,5°C öhdəliyinin yerinə yetirilməsinə töhfə verəcək.
