Bakı, TurkicWorld
İqlim dəyişiklikləri inkişaf etməkdə olan kiçik ada dövlətlərə (SIDS) ciddi zərbə vurur.
TurkicWorld xəbər verir ki, bunu Palau Prezidenti Surangel Semuel Uipps COP29-da milli bəyanatla çıxışında bildirib.
"İqlim dəyişiklikləri bizim adalarımıza müdaxilə edir, ərzaq təhlükəsizliyimizə, infrastrukturumuza, iqtisadiyyatımıza, mədəniyyətimizə və hətta mövcudluğumuza təhlükə yaradır", - deyə o qeyd edib.
O, bu təsirləri qlobal sabitliyə zərbə kimi qiymətləndirib və Paris Sazişinin hədəflərinə nail olmaq və qlobal temperatur artımını 1,5°C daxilində saxlamaq üçün kollektiv iradəyə çağırıb.
Prezident, Yeni Kollektiv Kəmiyyət Hədəfinin (NCQG) iqlim maliyyəsi baxımından əhəmiyyətini vurğulayaraq, onun uyğunluğunu və kifayətliliyini təmin etməyə çağırıb.
"Bu gün başlayacağımız tədbirlər bizim sağ qalmağımız üçün həyati əhəmiyyət daşıyır", - deyə o əlavə edib.
S.S.Uipps Palaunun iqlim təşəbbüsləri, o cümlədən bərpa olunan enerji mənbələrinə keçid, təbiəti mühafizə həlləri və yerli icmaların dayanıqlığının artırılması haqqında məlumat verib. Lakin o, sənaye inkişaf etmiş ölkələrin qalıq yanacaqlardan imtina prosesini sürətləndirməsinin vacibliyini vurğulayıb.
"Palau və Cənub-Qərbi Sakit Okeanda dəniz səviyyəsi digər bölgələrə nisbətən daha sürətlə artır. 1980-ci ildən bəri dəniz səthinin temperaturu dünya üzrə orta göstəricidən üç dəfə daha sürətlə artır, dəniz istilik dalğalarının tezliyi ikiqat artıb, daha intensiv və uzun müddətli olub. Bizim məşhur meduzalarımız yoxa çıxır, mərcan rifləri ağarır və balıq populyasiyaları azalır. Bunların hamısı qalıq yanacaqlardan asılılığımızın nəticəsidir", - deyə o bildirib.
O, okean və iqlim arasında əlaqəyə xüsusi diqqət yetirilməsinə, dayanıqlı okean iqtisadiyyatının, dəniz ekosistemlərinin qorunmasının və sahilyanı ərazilərin dayanıqlığının artırılmasının vacibliyini vurğulayıb.
Qeyd edək ki, noyabrın 11-də BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29) açılışı olub.
COP29 çərçivəsində ən yüksək səviyyəli tədbir – Dünya Liderlərinin İqlim Fəaliyyəti Sammiti noyabrın 12-13-də təşkil olunub.
Noyabrın 22-dək Bakı Stadionunda keçiriləcək COP29 Azərbaycanın bu günədək təşkil etdiyi ən nəhəng tədbirdir və regionda ilk dəfə Azərbaycanda baş tutur.
COP29-dan əsas gözlənti iqlim maliyyəsi ilə bağlı ədalətli və ambisiyalı Yeni Kollektiv Kəmiyyət Hədəfinin (NCQG) razılaşdırılmasından ibarətdir.
COP29 Sədrliyi tərəfindən iqlim fəaliyyəti ilə dayanıqlı inkişaf məqsədləri arasında əlaqəni ehtiva edən, yaşıl enerji dəhlizləri, yaşıl enerji saxlancları, iqlim dayanıqlılığı üçün harmoniya, təmiz hidrogen, orqanik tullantılarda metanın azaldılması, yaşıl rəqəmsal fəaliyyət və digər mövzuları əhatə edən 14 təşəbbüs irəli sürülüb.
İqlim maliyyəsinin yaradılması fəaliyyət üçün şərait yaradan əsas prioritet olmaqla yanaşı, hamını bir araya gətirməklə 1,5°C öhdəliyinin yerinə yetirilməsinə töhfə verəcək.
